Lugansk Xalq Respublikasi jamoat palatasi viloyat rahbari Leonid Pasechnik va Xalq kengashiga Rossiyaga qo‘shilish bo‘yicha zudlik bilan referendum o‘tkazish tashabbusi bilan murojaat qildi, deya xabar beradi “RBK”.
“Biz Lugansk Xalq Respublikasi hududida zudlik bilan referendum o‘tkazish bo‘yicha qat’iy qaror qabul qilishning ayni vaqti deb hisoblaymiz. Rossiyaga qo‘shilish nafaqat tarixiy adolat tantanasi bo‘ladi, balki respublika hududi xavfsizligini ham ta’minlaydi”, — deyiladi jamoatchilik palatasi raisi o‘rinbosari Lina Vokalova bayonotida.
Uning so‘zlariga ko‘ra, Rossiyaga qo‘shilish LXR uchun “mintaqaning kuchini tiklash va uni to‘liq tinch hayotga qaytarish” uchun yangi imkoniyatlar ochadi. Vokalova referendumning zudlik bilan o‘tkazilishi sababini “so‘nggi kunlardagi voqealar” deb izohladi. Uning fikr bildirishicha, “Kiev millatchilari qizil chiziqlarning barchasini kesib o‘tib bo‘lishdi”.
Avvalroq 1-sentabrda Prezident ma’muriyatiga yaqin beshta manba Kremlning kuz oxirigacha LXR, DXR hamda harbiy hududlari Rossiya nazoratiga olingan Xarkov, Zaporojye va Xerson viloyatlarida referendumlar o‘tkazilishiga umid qilayotgani haqida xabar bergan edi. 3-sentabr kuni viloyat harbiy-fuqarolik ma’muriyati bosh kengashi a’zosi Vladimir Rogov Telegram’da Zaporojye viloyatining Rossiya nazorati ostidagi qismiga ovoz berish uskunalari namunalari yetkazib berilgani haqida yozgan edi.
7-sentabrda esa “Yagona Rossiya” Bosh kengashi kotibi Andrey Turchak DXR, LXR va “ozod qilingan hududlar”, ya’ni Xerson, Zaporojye va Xarkov viloyatlarini 4-noyabr — Milliy birlik kuni munosabati bilan Rossiya tarkibiga qo‘shish bo‘yicha referendum o‘tkazish ramziy va to‘g‘ri bo‘lishini aytgan edi. Turchakning aytishicha, mahalliy aholi ham bunga tayyor.
Mavzuga doir: Zelenskiy Qrimni diplomatiya yo‘li bilan Ukrainaga qaytarish mumkinligini aytdi
Izoh (0)