Эрдўғон Путиннинг низони тугатиш ниятини маълум қилди ва Украинага юзланди

Россия президенти Владимир Путин иложи борича тезроқ Украинадаги низони тугатмоқчи, жанговар ҳаракатлар тўхтатилиши учун Киев Москва билан ҳамфикрликка эришиши керак. Бу ҳақда Туркия президенти Ражаб Тоййиб Эрдўғон PBS телеканалига берган интервьюсида маълум қилди, деб ёзади «РБК».

Эрдўғоннинг айтишича, у Ўзбекистонда ШҲТ саммити доирасида Путин билан ҳар томонлама музокаралар ўтказган ва шу жараёнда унинг интилишларини тушуниб етган. Унинг айтишича, томонлар маҳбусларни айирбошлаш бўйича битимга эришган, қишлоқ хўжалик маҳсулотларини бозорларга чиқариш имкониятлари ўрганилмоқда.

«Бу, албатта, яхши воқеалар, лекин Украина Россия билан ҳамфикр бўлиши керак», — дея таъкидлади Туркия президенти.

Журналист Эрдўғонга республиканинг ШҲТга аъзо бўлишни исташи ҳақидаги ўзининг гапларини эслатди ва «Туркия Ғарбнинг бир бўлагига айланмоқчими ёки Шарқнингми?» — деб шунга аниқлик киритишни сўради. Туркия президенти бунга жавобан, мамлакат Ғарбнинг ҳам, Шарқнинг ҳам эмас,  балки «дунёнинг бир бўлаги» эканини айтди. Бундан ташқари, деб давом этди у, Евроиттифоқ 52 йил давомида Туркияни ўз таркибига қўшишни «кечиктириб юрган», бошқа ҳеч қайси Европа давлати бундай вазиятга тушмаган. Анқара кимга қўшилишни ўзи танлаш ҳуқуқига эга, деди у.

«Биз бундай музокараларни олиб бораётганимизда, Евроиттифоқ қаршисида ҳисоб бериш ниятимиз бўлмайди», — дея таъкидлади Эрдўғон.

Унинг қайд этишича, Туркия дунёнинг барча мамлакатлари билан мулоқотни йўлга қўйган, Путин билан, ХХР раҳбари Си Цзиньпин билан, Ҳиндистон бош вазири Нарендра Моди билан учрашувлар ўтказилмоқда, «чунки барчамиз — шу дунёнинг бир бўлагимиз».

Украинадаги зиддиятни якунлаш ҳақида шунга ўхшаш баёнотни Россия президенти ШҲТ саммитида Ҳиндистон бош вазири билан суҳбат чоғида айтиб ўтган эди. Путин Украинадаги вазият юзасидан Нью-Деҳлининг позициясидан ва «сиз доим айтиб келадиган хавотирларингиздан» хабардорлигини қайд этди.

«Буларнинг барчаси иложи борича тезроқ тугаши учун қўлимиздан келганини қиламиз. Афсуски, қарши томон, Украина раҳбарияти музокаралар жараёнидан бош тортмоқда, ўз мақсадларига ҳарбий йўл билан эришишини айтди. Улар айтганидек, жанг майдонида», — деди Путин.

Эслатиб ўтамиз, август бошида Эрдўғон ва Путин Сочида музокаралар ўтказган эди. CNN Turk маълумотларига кўра, ушбу учрашув давомида Россия президенти Зеленский билан музокаралар эҳтимоли борлигига «ишора қилган».

Россия ва Украина ўртасида ҳарбий низолар бошланганидан буён Туркия улар ўртасида воситачилик қилишга интилмоқда. Шу пайтгача Эрдўғон ўз мамлакатида Путин ва Зеленский учун саммит ташкиллаштиришни кўп бора таклиф қилган. Шунингдек, унинг воситачилигида жанговар ҳаракатлар туфайли портларда қолиб кетган донни Украинадан чиқариб кетиш бўйича битим тузилган.