O‘zbekiston Respublikasi Prezidenti Sh.M. Mirziyoyev tomonidan neft va gaz sanoatining moliyaviy barqarorligini oshirish bo‘yicha ustuvor chora-tadbirlar to‘g‘risida belgilangan vazifalar ijrosini ta’minlash maqsadida “O‘zbekneftgaz” AJ Boshqaruvi raisi Mehriddin Abdullayev Buxoro neftni qayta ishlash zavodining ishlab chiqarish maydonchalariga tashrif buyurdi.
Xizmat safari doirasida mutaxassislar bilan uchrashuv bo‘lib o‘tdi, zavodning joriy faoliyati bilan bog‘liq muhim masalalar muhokama qilindi.
Xususan, Boshqaruv raisi Qorovulbozor shahridagi quyish-to‘kish estakadasini rekonstruksiya qilish loyihasi bo‘yicha amalga oshirilayotgan ishlar jarayoni bilan tanishdi. Asosiy qo‘rilmalar ko‘zdan kechirildi, bugungi kunga qadar qilingan ishlar bo‘yicha hisobot taqdim etildi.
“O‘zbekneftgaz” AJ Boshqaruv raisi boshchiligida amalga oshirilayotgan ishlar jarayonidagi mavjud muammoli masalalar muhokamasiga bag‘ishlangan sayyor yig‘ilish o‘tkazildi. Unda obyektlarni o‘z vaqtida topshirishni tezlashtirish bo‘yicha yechimlar belgilab berildi.
Shuningdek, yig‘ilishda GTL sintetik kerosinini komponent sifatida jalb etish natijasida “Jet A-1” aviayoqilg‘isini ishlab chiqarish bilan bog‘liq asosiy masalalar muhokama qilindi.
O‘z navbatida, ta’kidlash joiz Buxoro neftni qayta ishlash zavodida “Buxoro neftni qayta ishlash zavodida GTL sintetik kerosin komponentlarini ishlab chiqarishga jalb etish orqali ishlab chiqarishni kengaytirish” loyihasi bo‘yicha ishlar qizg‘in davom etmoqda.
Bugungi kunda barcha infratuzilma sintetik yoqilg‘ini qabul qilishga tayyor, shuningdek “Jet A-1” aviatsiya yoqilg‘isini ishlab chiqarish uchun tayyor mahsulot darajasiga yetkazish bo‘yicha to‘liq dastur ishlab chiqilgan.
“O‘zbekneftgaz” AJ Boshqaruv raisi boshchiligida ishlab chiqarish hajmini oshirish va respublika aeroportlarini aviatsiya yoqilg‘isi bilan ta’minlash maqsadida sintetik yoqilg‘ilarni jalb etish loyihasini amalga oshirish uchun ishchi guruh tashkil etildi.
Ma’lumot uchun: jahon tarixida ilk bor, “Uzbekistan GTL” zavodida xalqaro standart (ASTM D-7566) va texnik talablariga mos bo‘lgan sintetik aviakerosin mahsuloti ishlab chiqarilishi yo‘lga qo‘yildi.
“Uzbekistan GTL” zavodi tomonidan IATA, ASTM International, Def Stan xalqaro tashkilotlarining aviatsiya yoqilg‘isi uchun xom ashyo sifatida GTL kerosinini sintetik komponent sifatida foydalanishga ruxsat etilganligi to‘g‘risida ijobiy xulosalar olingan.
Respublikaning aviatsiya yoqilg‘isiga bo‘lgan ehtiyojini ta’minlash uchun aviatsiya kerosinini, ya’ni yarim sintetik yoqilg‘ini yetkazib berish hajmini oshirishni talab qiladi.
Shuningdek, tashrif doirasida “Neftchi” shaharchasining madaniyat saroyida joylashgan Buxoro neftni qayta ishlash zavodining tarixi va yutuqlarini o‘zidan mujassam etgan korporativ muzeyining ochilishi bo‘lib o‘tdi. Uni tantanali ravishda “O‘zbekneftgaz” AJ Boshqaruvi raisi Mexriddin Abdullayev va zavod direktori A.Fozilov ochib berdi.
Muzeyda zavod haqida juda ko‘p ma’lumotlar, shuningdek, video intervyular va biografik materiallar mavjud.
Muzey installyatsiyasidan birida korxonaning texnologik uskunalari imitatsiyasining bir qismini ko‘rish mumkin. Bu zavod jamoasi g‘oyalari bilan yaratilgan ijodiy va qiziqarli element.
Ushbu muzey zavod prefessional jamoasi tomonidan yaratilgan bo‘lib, Buxoro neftni qayta ishlash zavodining qiziqarli loyihalaridan biri hisoblanadi.
“O‘zbekneftgaz” AJ Matbuot xizmati
Izoh (0)