Ijtimoiy tarmoqlarda “Sergeli tumanidagi 284-maktab 1-sinf o‘quvchilarining ota-onalaridan darsliklarning 5 tasi uchun 100 ming so‘mdan pul to‘lashibdi. Bundan tashqari, maktabni kameralashtirish uchun har sinfdan salkam 1 million, xonalarni jihozlash uchun ham pul so‘ralayotgan emish” mazmunidagi xabar tarqalgandi. Holat Toshkent shahri xalq ta’limi bosh boshqarmasi tomonidan o‘rganildi.
Ta’kidlanishicha, bugungi kunda 284-sonli umumta’lim maktabida 2431 nafar o‘quvchi ta’lim olmoqda. Yangi o‘quv yilida 1-sinfga 279 nafar o‘g‘il-qiz qabul qilindi. Shulardan 174 nafar o‘quvchiga rus tilida ta’lim berilmoqda. Amaldagi o‘quv yilida o‘quvchilar sonining rejadagiga nisbatan ko‘paygani evaziga ularni darslik bilan ta’minlashda uzilish ro‘y bergan. Mazkur masalani ijobiy hal qilish boshqa hududlardan orttirilgan darsliklar hisobiga qoplangan.
Prezidentning tegishli farmonlariga muvofiq, o‘quvchilar davomatini masofadan monitoring qilish, o‘quvchilarning kelish va ketish vaqtlari nazorati bilan bog‘liq bo‘lgan o‘quv jarayonini avtomatlashtirish tizimlarini joriy etish vazifasi topshirilgan. Jumladan, mazkur topshiriq ijrosini ta’minlash maqsadida 284-maktabga ovozli videokameralar o‘rnatilgan. Bu ishlar to‘liq homiylar ko‘magida amalga oshirilgan.
“Hurmatli ota-onalar! Eslatib o‘tamiz, maktablarda darsliklar bilan muammoli holat yuzaga kelganda, ota-onalarning murojaat qilishlari uchun @bookedu_bot maxsus Telegram boti ishga tushirilgan. Agar sizda ushbu holat yuzasidan biror savol paydo bo‘lsa, yuqoridagi manzilda ko‘rsatilgan bot orqali batafsil javob olishingiz mumkin”, — deyiladi munosabatda.
Izoh (0)