Germaniya, Polsha va Fransiya Yevropa Ittifoqining Rossiyaga nisbatan siyosatini qayta ko‘rib chiqishni qo‘llab-quvvatlaydi

Fransiya, Germaniya va Polsha Tashqi ishlar vazirliklari vakillari Ukrainadagi maxsus operatsiya Yevroittifoqning Moskva bilan munosabatlarida burilish nuqtasi bo‘lganini va endilikda ittifoq ikki tomonlama munosabatlarning asosiy tamoyillarini qayta ko‘rib chiqishiga to‘g‘ri kelishini aytdi.

Ukrainadagi voqealar fonida Yevropa Ittifoqi Rossiyaga nisbatan siyosatining asosiy tamoyillarini qayta ko‘rib chiqishi kerak, deyiladi Germaniya, Fransiya va Polshaning Yevropa ishlari bo‘yicha vazirlari qo‘shma bayonotida.

Diplomatlar 1991-yildan beri mavjud bo‘lgan uch davlat o‘rtasidagi hamkorlikni rivojlantirish bo‘yicha mintaqaviy guruh – Veymar uchburchagi formatida uchrashuv o‘tkazdi.

Muzokaralar yakunlari bo‘yicha e’lon qilingan hujjatda ular Rossiyaning Ukrainaga qarshi “tajovuzkor” maxsus operatsiyasi Bryussel va Moskva o‘rtasidagi munosabatlarda tub burilish nuqtasi bo‘lganini aytishgan.

“Biz Yevropa Ittifoqining Rossiyaga nisbatan siyosatining asosiy tamoyillarini qayta belgilashimiz kerak”, — deydi vazirlar.

Shuningdek, Fransiya, Germaniya va Polsha tashqi ishlar vazirliklari vakillari tomonidan Ukraina harbiylariga uzoq muddatli yordam berish “uskunalar bilan ta'minlash doirasidan tashqariga chiqishni” nazarda tutayotganini tan olishlarini ta’kidlandi. Kelajakda Yevropa Ittifoqida “Ukraina kuchlarini Yevroittifoqda tayyorlash va ularga yordam berish, shuningdek, harbiy vositalariga texnik xizmat ko‘rsatish va ta‘mirlashni ta‘minlaydigan" maxsus missiya yaratilishi mumkin.

Yevroittifoq bunday missiya yaratish masalasini muhokama qilayotgani haqida avgust oyida Yevropa diplomatiyasi rahbari Jozef Borrel ma’lum qilgan edi.

Rossiya Tashqi ishlar vazirligi esa uning so‘zlariga izoh berar ekan, barchasini o‘z nomi bilan atashga chaqirgandi. “Yevropa Ittifoqi Kiyev rejimiga terrorchilar va natsist jangchilarni tayyorlash uchun o‘quv bazalarini yaratmoqchi. Yuz yil oldin yevropaliklar fashizm nima ekanligini ham darhol anglay olishmagandi. Tushungan vaqtlarida esa ancha kech bo‘lib ulgurgandi”, — dedi bo'lim vakili Mariya Zaxarova.