Si Szinpin Qozog‘istonda Rim papasi bilan uchrashishdan bosh tortgan

Vatikan Xitoy Xalq Respublikasi (XXR) hukumatiga Rim papasi Fransisk va Xitoy yetakchisi Si Szinpin o‘rtasida uchrashuv tashkillashtirishni taklif qilgan, chunki o‘sha payti ikkala yetakchi ham Qozog‘istonda bo‘lgan. Biroq Pekin taklifni rad etgan. Bu haqda Reuters Vatikandagi manbasiga tayanib xabar berdi.

Manbaga ko‘ra, uchrashish tashabbusi Rim papasidan chiqqan, ammo Xitoy tomoni “bunday taklifni qadrlashini” aytib, afsuski, Si Szinpinning grafigida bo‘sh vaqt yo‘qligini ma’lum qilgan. Ular bungacha ham hech qachon yuzma-yuz uchrashmagan.

Papa Fransisk va Si Szinpin ikkalasi ham 14-sentabr, chorshanba kuni Nur-Sultonda edi. Si Szinpin u yerga rasmiy tashrif bilan borgan, Rim papasi esa Dunyoviy va an’anaviy dinlar yetakchilarining VII qurultoyida qatnashgan.

Qozog‘istonga kelib, respublika prezidenti Qosim-Jo‘mart To‘qayev bilan uchrashganidan keyin Rim papasi “Qozog‘iston konsert zalida hukumat, fuqarolik jamiyati va diplomatik korpusga murojaat qildi. “O‘zaro ziddiyatda bo‘lgan bloklar dushmanligini chuqurlashtirmaslik va ularni kuchaytirishni to‘xtatishni o‘rganish vaqti keldi. Bizga shunday yetakchilar kerakki, ular yangi avlodlar haqida qayg‘urib, xalqaro darajada xalqlar o‘rtasida hamjihatlik va muloqotga imkoniyat yaratsin, “Xelsinki ruhi”, multilateralizmni mustahkamlashga intilishni qayta tiklasin, yanada barqaror va xotirjam dunyoni qursin”, — dedi Fransisk.

Si Szinpin koronavirus pandemiyasi boshlanganidan buyon ilk turnesi doirasida Qozog‘istonga 14-sentabr kuni yetib keldi. U To‘qayev bilan muzokaralar o‘tkazdi, shundan keyin Qozog‘istonning oliy davlat mukofoti — “Altin Kiran” ordeni bilan taqdirlandi.