Armaniston bosh vaziri Nikol Pashinyan arman-ozar chegarasidagi holat bo‘yicha Rossiya prezidenti Vladimir Putin bilan telefonda suhbat o‘tkazdi, deya xabar beradi “RBK”.
Pashinyanning so‘zlariga ko‘ra, ayni paytda chegaradagi holat “nisbatan tinch” bo‘lsa-da, vaziyat hamon “ancha tarang”ligicha qolmoqda.
Ikki davlat rahbari o‘rtasidagi muzokaralarni Kreml ham tasdiqladi. Rossiya prezidentining matbuot kotibi Dmitriy Peskovning aniqlik kiritishicha, suhbat 15-sentabr kechki vaqtda bo‘lib o‘tgan.
Armaniston hukumati matbuot xizmatining ma’lumotlariga ko‘ra, Pashinyan AQSH davlat kotibi Antoni Blinken bilan ham telefonda suhbat olib borgan. Arman-ozar chegarasidagi to‘qnashuvlar haqida fikr bildirar ekan, davlat departamenti rahbari AQSH tinchlik va muzokalarga tayyor ekanini aytgan.
Bundan tashqari, Armaniston bosh vazirining Fransiya prezidenti Emmanuel Makron bilan telefondagi suhbatlari ham ayni shu mavzuda bo‘lgan.
13-sentabrga o‘tar kechasi Armaniston va Ozarbayjon qo‘shinlari o‘rtasida chegarada yangi to‘qnashuvlar boshlangan edi. Har ikki tomondan jami 176 nafar askar halok bo‘ldi. 15-sentabr kuni Yerevan Boku bilan sulhga erishilganini e’lon qildi. Shu kuni kechqurun Kollektiv xavfsizlik shartnomasi tashkiloti missiyasi mojaro zonasidagi vaziyatni baholash uchun Armanistonga keldi.
Izoh (0)