Lugansk xalq respublikasi (LXR) rasmiylari Luganskdagi Bosh prokuratura binosida portlash sodir bo‘lgani haqida xabar berdi. Portlashda LXR bosh prokurori Sergey Gorenko va uning o‘rinbosari Yekaterina Steglenko halok bo‘ldi. Ularning o‘limini LXR rahbari Leonid Pasechnik tasdiqladi. Rossiya Tergov qo‘mitasi rahbari Aleksandr Bastrikin bosh prokuror va LXR prokurori o‘rinbosarining o‘limi yuzasidan jinoiy ish qo‘zg‘atishni buyurdi.
“Bugun terrorchilik akti oqibatida LXR bosh prokurori Sergey Gorenko va uning o‘rinbosari Yekaterina Steglenko halok bo‘ldi. Lugansk xalq respublikasi Bosh prokuraturasi binosida yuz bergan portlash Kiyev rejimi ruxsat etilgan chegaralarni kesib o‘tganidan dalolat beradi”, — deb yozdi Leonid Pasechnik o‘zining Telegram-kanalida. U LXR aholisini “vahimaga tushmaslik”ka chaqirdi va “respublikadagi vaziyat nazorat ostida” ekanini ta’kidladi.
“Bosh prokuratura binosidagi portlash epitsentri bosh prokuror idorasi yaqinida bo‘lgan”, — deydi manba Luganskdagi portlash tafsilotlari haqida “Interfaks”ga. Respublika xalq militsiyasining xabar berishicha, muassasa binosida qo‘lbola portlovchi qurilma portlagan.
Sergey Gorenko — Lugansk viloyati, Sverdlovsk shahrida tug‘ilgan, u 40 yoshda edi. Gorenko 2017-yildan beri LXR bosh prokurori lavozimida ishlab kelgan.
Yekaterina Steglenko ham Sverdlovsk shahrida tug‘ilgan, u 44 yoshda edi. U 2017-yildan buyon LXR bosh prokurori o‘rinbosari lavozimida ishlab kelgan.
Izoh (0)