O‘zbekiston prezidenti Shavkat Mirziyoyev avgust oyida tadbirkorlar bilan uchrashuvda yer va mulk ajratish haqidagi qarorlarni bekor qilish faqat va faqat sud tartibida amalga oshirilshiga alohida to‘xtalib o‘tgan edi. Prezident o‘z nutqida barcha hokimlarning e’tiborini ushbu masalaga qaratdi – mulk huquqiga oid qarorlarni ular tomonidan bekor qilishga yo‘l qo‘yilmasligini qat’iy ta’kidlagandi.
Namangan viloyati Pop tumanida tadbirkorlik qiluvchi Amanjon Matkomilov tuman hokimining noto‘g‘ri qaror chiqarishi va o‘z qarorini o‘zi bekor qilishi ortidan yillab sud organlarida o‘z huquqini ta’minlash uchun kurashgan. Natijada tadbirkor huquqlari tiklanishiga erishgan. Lekin yillarga cho‘zilgan sud jarayonlari ishbilarmonga ham ma’naviy, ham moddiy jihatdan katta zarar yetkazgan.
Amanjon Matkomilov “Daryo” muxbiriga bergan qisqacha intervyusida hokimlarning o‘z qarorlarini o‘zi bekor qilishi xususidagi mulohazalarini bildirdi.
Bu kabi ishlar nafaqat mamlakat ichidagi fuqarolarga emas chet eldan keladigan investorlarga ham salbiy ta’sir ko‘rsatadi. Shuning uchun davlat organi bunday bo‘lmasligi, bir so‘zli bo‘lishi kerak.Mutaxassislarning fikricha, rivojlangan huquq tizimida mulk huquqidan mahrum qilish faqat va faqat sud orqali amalga oshirilishi eng to‘g‘ri yo‘l sifatida qabul qilingan. Ijro hokimiyati o‘z qarorini bekor qilishi ortidan tadbirkorlar kutilmagan ziyonga duch kelmasligi, o‘z mulkidan ayrilib qolmasligi kerak. Chunki qaysidir hokimning o‘ta subyektiv munosabati natijasida biznes zarar ko‘rmasligi kerak.Tushkunlikka tushasiz, hamma ishingizni yig‘ishtirib hokimiyatning lafzsizligi tufayli sarsongarchilikka duch kelasiz.
O‘zimni misolimda oladigan bo‘lsak, bitta ish boshlanib yakuniga yetguniga qadar 5-6 marta majlis bo‘lib o‘tdi. Har biri ikki soatdan. Ungacha bo‘lgan davrda taxminan 6 oycha sarson bo‘lib yurdik. Hozir 5-marta ish ko‘rib chiqildi, bu 5 ta majlis degani. Bitta ishni ortidan uch yil vaqt o‘tib ketdi. Uch yildan beri oddiy tadbirkorning sarson bo‘lish hisobini olavering.
Aslini olganda tadbirkorga to‘sqinlik qilish prezidentimiz aytgandek, davlat siyosatiga ochiq xiyonat. Sababi hokimiyat – budjet tashkiloti bo‘lsa, biz budjetga soliq to‘lovchi, uni to‘ldiruvchimiz. Ular o‘z oyog‘iga o‘zi bolta urgandek go‘yo. Negaki ularning olayotgan oyligi, tirikchiligi biz orqali, ya’ni soliq to‘lovchilar orqali bo‘ladi.
Soliq to‘lovchilarga erkinlik yaratish kerak. Ularga yordam qilib, rivojlantirib ko‘mak bersa, chet eldan kuzatib turgan, pulini olib keladigan investorlarni mamlakatga, hokimiyatga ishonchi ortib boradi.
Albatta, bu tadbirkorning biznes vakillarining davlatga bo‘lgan ishonchini orttiraadi. Xudo xohlasa bundan buyog‘iga yaxshi tashabbuslar o‘zining natijasini ko‘rsatadi.
Ushbu masala to‘liq sudlar ixtiyoriga o‘tkazilishi, biznesda kelajakka ishonch muhitini yaratadi, mol-mulk sohasiga investitsiya kiritish hajmini kengaytiradi.
Izoh (0)