Россия Молия вазирлиги санкциялардан бевосита талафотларни юзлаб миллиард долларга баҳолади — Bloomberg

Россия молия сектори Украинага ҳужум бошланганидан кейин Ғарб томонидан жорий қилинган санкциялар туфайли кўрган бевосита талафотлар ҳажми юзлаб миллиард долларга тенг. Бу ҳақда Bloomberg Россия Молия вазирлигининг ички ҳужжатига таяниб хабар бермоқда.

Агентлик маълумотларига кўра, ушбу маъруза 29 август куни юқори мансабли россиялик амалдорлар иштирокидаги йиғилиш учун тайёрланган. Ҳужжат мазмунини мажлисдан хабардор бўлган манбалар тасдиқлаган.

Вазирлик, ҳужжатга мувофиқ, бевосита талафотларга қуйидагиларни киритган:

• фонд бозори капитализациясининг 40 фоизга пасайиши;
• банк капиталининг 10 фоизга пасайиши;
• Марказий банкнинг 300 миллиард доллар миқдоридаги музлатиб қўйилган валюта захиралари;
• 4,6 триллион рубль ҳажмида музлатилган евробондлар;
• 563 миллиард рубль музлатилган чакана активлар.

Россия Молий вазирлиги изоҳлардан бош тортди. Bloomberg қайд этишича, 12 сентябрь куни Россия президенти Владимир Путин «Россия ташқи босимни дадиллик билан эплаётганини», иқтисодиёт эса «аста-секинлик билан барқарорлашаётгани, текисланаётгани, ўсиш траекториясига чиқаётгани»ни айтган.

Август охирида, Bloomberg маълумотларига кўра, Россия ҳукуматида санкцияларнинг иқтисодиётга таъсири ҳақидаги маъруза тақдим этилган. Маърузани бир неча ойлар давомида тайёрлаган россиялик мансабдорлар ва экспертлар фикрича, Россия иқтисодиётнинг муҳим секторларига хавф солувчи Ғарб санкциялари туфайли янада узоқроқ давом этувчи ва чуқурроқ бўлган рецессияга дуч келиши мумкин.

Февраль охиридан буён АҚШ, Евроиттифоқ ва уларнинг иттифоқдошлари Украинадаги махсус операциялар туфайли, Россияга қарши санкцияларнинг бир нечта пакетини киритди. Чеклов чоралари Марказий банк, олтин-валюта захираалри, энг йирик банклар, импорт ва экспорт, энергетика сектори, россиялик бизнесменлар ва сиёсатчиларга тааллуқли бўлди.

Россия ҳукумати Ғарб санкцияларини ноқонуний деб ҳисоблайди. Путин уларни «тентакона ва мулоҳазасиз» деб атади. Шунингдек, Евроиттифоқ «санкция безгаги»дан кўрадиган бевосита талафот келаси йили 400 миллиард доллардан ошиши мумкинлигини ҳам айтди.

Аввалроқ Еврокомиссия раҳбари Урсула фон дер Ляйен Россияга қарши санкцияларни сақлаб қолишга ваъда берган эди.