Qozog‘iston poytaxti Nur-Sulton maslahati (mahalliy vakillik organi) deputatlari 15-sentabr kuni bo‘lib o‘tgan yig‘ilishda shahar nomini Ostonaga qaytarish taklifini qo‘llab-quvvatladi.
“Jahon amaliyotida poytaxtlar, davlatlarning nomlari o‘zgartirilganiga misollar bor. Men bu yerning tub aholisi sifatida shaharga Ostona nomining qaytarilishini qo‘llab-quvvatlayman, chunki o‘tgan yillar davomida bu nom chinakam taniqli brendga aylandi”, — dedi majlisda deputat Asqar Smagulov.
Qozog‘iston poytaxti 1998-yildan buyon Ostona deb atalgan. Ungacha shahar 1992-yildan keyin Akmola deb nomlangan va o‘sha paytda poytaxt bo‘lmagan (Olmaota shahri shunday maqomga ega bo‘lgan). Akmola 1961-yildan 1992-yilga qadar Selinograd, undan ham avval esa Akmolinsk deb atalgan.
2019-yil mart oyida Ostona Qozog‘iston birinchi prezidenti Nursulton Nazarboyev sharafiga Nur-Sulton deb o‘zgartirilgan. Qaror Qozog‘iston prezidenti Qosim-Jo‘mart To‘qayev tashabbusi bilan qabul qilingan. 2022-yil sentabr oyi boshida “Jana Qazaqstan” parlamenti deputatlari guruhi poytaxtga avvalgi nomini qaytarishni taklif qildi. To‘qayev deputatlarning tashabbusini qo‘llab-quvvatladi.
Izoh (0)