“Hech qanday qutqaruv chorasi yo‘q” — AQSH neft va gaz ishlab chiqaruvchilar Yevropa inqirozi haqida

AQSH slanetsli neft va gaz ishlab chiqaruvchilar Yevropaga bu qishda energiya inqirozini yengishda yordam beradigan darajada ishlab chiqarish hajmini oshira olmasligi haqida ogohlantirmoqda. Bu haqda Financial Times xabar berdi.

So‘nggi paytlarda neft narxi pasayganiga qaramay, bozordagi vaziyat dekabr oyi boshida, Rossiya neftini sotib olishga Yevropa embargosi ​​kuchga kirganida o‘zgarishi mumkin.

AQSH moliya vaziri Janet Yellen joriy haftada embargo joriy etilishi neft narxining oshishiga olib kelishi mumkinligi haqida ogohlantirdi. Ekspertlarning fikricha, narxlar yana bir barrel uchun 100 dollardan oshadi.

AQSH Yevropaga neft va suyultirilgan gaz (LNG) eksportini oshirdi, biroq sanoat rasmiylarining ta’kidlashicha, ta’minot hajmi hozirgacha eng yuqori darajaga deyarli yetdi, shu bilan birga mahalliy neft qazib olish bu yil hukumat ko‘rsatmalaridan kuniga taxminan 1 million barrelga kam bo‘ladi.

AQSH ishlab chiqarishni keskin oshira olmaydi. Hech qanday qutqaruv bo‘lmaydi — na neftdan, na gazdan, — deydi slanets sektoridagi eng yirik investorlardan biri bo‘lgan Quantum Energy Partners xususiy sarmoya fondi rahbari Vil Vanlo.

Pioneer Natural Resources bosh ijrochi direktori Skott Sheffild esa AQSH slanets ishlab chiqaruvchilari ishlab chiqarishni sezilarli darajada oshirishlari mumkinmi, degan savolga:

Yo‘q, bu sodir bo‘ladi deb o‘ylamayman. Biz yangi qurilmalarni ishga tushirmaymiz va men buni boshqa biror kompaniya amalga oshirayotganini ham ko‘rmayapman, — dedi u.

Uning fikricha, bu qishda neft narxi bir barrel uchun 120 dollardan oshishi mumkin.

Kimmeridge Energy xususiy sarmoya fondi rahbari Ben Dellning so‘zlariga ko‘ra, aksiyadorlar neft va gaz kompaniyalariga ishlab chiqarishni keskin oshirish uchun ruxsat berishga tayyor emas, chunki bu yangi sarmoyalarni talab qiladi.

Boshqa tomondan, investorlar kompaniyalar kamroq xomashyo ishlab chiqarib, ko‘proq foyda keltirishini afzal ko‘radi.

Yaqin oylarda AQSHning neft va gaz yetkazib berish hajmining biroz oshirishi jahon miqyosidagi vaziyatni o‘zgartirmaydi, — deydi Greenlake Energy Ventures xususiy kon kompaniyasi rahbari.

Avvalroq jahonda neft qazib olish hajmi ketma-ket uchinchi oy o‘sayotgani haqida xabar berilgandi.