Yevropaning eng qashshoq davlati bo‘lgan Moldova qishga tayyorgarlik ko‘rayotgani sababli og‘ir ahvolda qolishi kutilmoqda. Bu haqda Bloomberg xabar berdi.
Moldova iqtisodiyoti Rossiya gazining to‘xtatilishi va energiya narxining “favqulodda yuqori” ekanligi hisobiga ikki barobar zarbaga duch kelishi mumkin.
Mamlakat bosh vaziri Natalya Gavrilita, Ukraina va Ruminiya o‘rtasida bo‘lgan 2,6 millionlik xalq barcha ssenariylarga tayyorlanayotganini, yillik inflyatsiya 30 foizdan oshib ketganini aytdi.
Bundan tashqari “Gazprom” bilan besh yillik shartnomada ko‘rsatilgan qarzlarni to‘lash bo‘yicha oxirgi muddat 1-oktabrda tugaydi. Muzokaralarda oldingga siljish bo‘lmasa, gaz yetkazib berish to‘liq to‘xtatilishi mumkin.
“Gazprom” yetkazib berishni davom ettirsa ham, biz iste’molni kamaytirishimiz kerak, chunki narxlar nihoyatda yuqori, — dedi Buxarestda bergan intervyusida 44 yoshli Gavrilita.
Moldova Yevropa Ittifoqiga qo‘shilish ambitsiyalarini ilgari surdi. YI yetakchilari iyun oyida Ukraina va Moldovani a‘zolikka nomzod sifatida ma’qullagan edi.
Mamlakat hukumati vaziyatni yengillashtirish uchun harakat qilmoqda. Poytaxt Kishinyovdagi isitish tizimini gazdan isitish moyiga o‘tkazish orqali iste’molni 15 foizga qisqartirish maqsad qilingan.
Gavrilita hukumati Ruminiya bilan potensial gazni arzon narxlarda yetkazib berish bo'yicha muzokaralarni boshlagan.
Avvalroq Yevropada retsessiya xavfi oxirgi 2 yildagi eng yuqori darajaga chiqqani haqida xabar berilgan edi
Izoh (0)