Fitch Ratings 2022-yil uchun global iqtisodiy o‘sish prognozini iyun oyida kutilgan 2,9 foizdan 2,4 foizgacha pasaytirdi. Bu haqda agentlik rasmiy saytidan ma’lum bo‘ldi.
Yevropadagi gaz inqirozi, yuqori inflyatsiya va jahonda pul-kredit siyosatining keskinlashuvi sur’atlarining tezlashishi iqtisodiy istiqbol uchun jiddiy oqibatlarga olib keladi, — deyiladi hisobotda.
2023-yil uchun global yalpi ichki mahsulotning o‘sish prognozi 2,7 foizdan 1,7 foizga tushirildi.
Fitch prognozlariga ko‘ra, yevrohudud va Buyuk Britaniya iqtisodiyoti joriy yilning oxirida retsessiya holatiga kiradi. AQSH esa 2023-yil o‘rtalarida yengil retsessiyaga duch keladi.
Yevropa yalpi ichki mahsuloti, agentlikning yangi prognoziga ko‘ra, gaz inqirozi oqibatlari tufayli 2023-yilda 0,1 foizga qisqaradi (iyun oyida 2,1 foizga o‘sish kutilgan edi).
Yangi prognozda Rossiyadan Yevropaga gaz yetkazib berishning to‘liq yoki deyarli to‘xtatilishi hisobga olingan.
Fitch ekspertlarining qayd etishicha, Yevropa Ittifoqining muqobil yetkazib berish manbalarini topishga urinishlariga qaramay, yaqin kelajakda mintaqada gaz yetkazib berish sezilarli darajada qisqaradi, bu esa sanoat sektoriga ta’sir qiladi.
2022-yil uchun AQSH iqtisodiyotining o‘sish prognozi 2,9 foizdan 1,7 foizga, 2023-yil uchun 1,5 foizdan 0,5 foizgacha pasaytirilgan.
Xitoy iqtisodiyotining tiklanishi karantin cheklovlari va ko‘chmas mulk bozoridagi pasayish bilan cheklanadi. Shuning uchun biz Xitoy yalpi ichki mahsuloti 2022-yilda 2,8 foizga va kelgusi yilda 4,5 foizga o‘sishini kutmoqdamiz, — deyiladi Fitch sharhida.
Iyul oyida Xitoy iqtisodiyotining o‘sishi mos ravishda 3,7 foiz va 5,3 foiz prognoz qilingan edi.
Ortib borayotgan inflyatsiya kutilmalari sabab dunyoning yetakchi markaziy banklari bazaviy foiz stavkalarni kutilganidan ancha tezroq oshirib bormoqda.
Fitch prognozlariga ko‘ra, Fed joriy yil oxirigacha stavkani 4 foizga ko‘taradi va uni 2023-yil davomida shu darajada ushlab turadi.
Yevropa Markaziy banki esa joriy yilning dekabriga qadar asosiy stavkasini 2 foizga yetkazadi.
Agentlik ekspertlarining fikricha, Angliya bankining bazaviy stavkasi 2023-yilning fevraliga qadar 3,25 foizga yetadi.
Avvalroq Fitch Ratings tomonidan O‘zbekiston kredit reytingi barqaror darajada tasdiqlangandi.
Izoh (0)