AQSHda Yaponiya aviatsiyasining Pyorl-Xarbor bazasiga hujumi chog‘ida halok bo‘lgan dengizchilardan biri Gerbert Jeykobson oradan 80 yil o‘tib, endi dafn qilinadi. Bu haqda Associated Press xabar bermoqda.
Jeykobson 1941-yil 7-dekabrda “Oklaxoma” avianosetsi (samolyotlar uchishi va qo‘nishi uchun moslangan harbiy kema)da halok bo‘lgan 400 dan ortiq dengizchilardan biri bo‘lgan. Qurbonlar jasadlarining bir qismi ikki yildan keyin qidirib topilib, ismlarini aniqlamasdan, Gavayi orollariga ko‘mib qo‘yildi. 2003-yilda 100 ga yaqin jasadlar qoldiqlarining shaxsini aniqlashga urinib ko‘rishdi, ammo bu muvaffaqiyatsiz bo‘ldi. 2015-yilda esa Pentagon ularni yana eksgumatsiya qilib, sud-tibbiy ekspertiza yordamida shaxsini tanib olish jarayonini o‘tkazishga qaror qildi.
Bu 355 kishining, shu jumladan, 21 yoshli Jeykobsonning shaxsini aniqlash imkonini berdi. Halok bo‘lganlarning bir qismi o‘tgan yili, hujumga 80 yil to‘lishi arafasida dafn etildi. Dengizchining jasadi Vashingtondagi Arlington qabristoniga ko‘miladi.
O‘tgan yillar davomida Jeykobsonning qarindoshlari u bilan nima yuz berganini aniqlashga urindi. Harbiy kemadagi safdoshlari bilan suhbatlardan ma’lum bo‘lishicha, u hujum oldidan navbatchilikdan qaytib kelgan va bir necha soat davomida odamlarni qirg‘oqqa qarab jo‘natgan. Boshqa taxminlarga ko‘ra esa, u uyqusida, “urush bo‘layotganini tushunib ulgurmasidanoq” halok bo‘lgan bo‘lishi ham mumkin, dedi uning jiyani Bred.
Izoh (0)