“Al-Qoida” 11-sentabr teraktlari haqida kitob chiqardi

“Al-Qoida” tashkiloti 2001-yil 11-sentabrda AQSHda sodir etilgan terrorchilik harakatlariga bag‘ishlangan kitob chop etdi, deb yozadi “Kommersant”.

Kitob teraktlarga 21 yil to‘lishiga atab nashr etilgan. Uning muallifi sifatida “Al-Qoida” yetakchilaridan biri Abu Muhammad al-Masriy ko‘rsatilgan bo‘lib, u 2020-yil Eronda o‘ldirilgan.

Kitobda aytilishicha, AQSHga zarba berish g‘oyasi “Al-Qoida”da 1996-yilda, “Tolibon” harakati Afg‘onistonda hokimiyatni qo‘lga olib, “Al-Qoida” ushbu mamlakatni o‘zining asosiy bazasi sifatida tanlaganidan keyin paydo bo‘lgan. AQSHga hujum qilishdan maqsad sifatida “Al-Qoida”ning amerikaliklarni “halokatga olib boruvchi uzoq muddatli urush”ga jalb qilish istagi keltirib o‘tilgan.

Ma’lum qilinishicha, fuqarolik samolyotlarini “Amerikaning muhim va ramziy binosiga borib urish” orqali terakt sodir etish taklifini “Al-Qoida”ga ilgari uchuvchi bo‘lib ishlagan misrlik a’zolaridan biri bergan.

Tashkilotning ba’zi ishtirokchilari 1998-yildayoq jangovar tayyorgarlik uchun tanlab olingan va dunyoning turli burchaklaridagi aviatsiya maktablarida o‘qitilgan.

Eslatib o‘tamiz, 2001-yil 11-sentabr kuni to‘rtta muvofiqlashtirilgan terrorchilik harakatlari amalga oshirilgan edi. Terrorchilarning to‘rtta guruhi — jami 19 kishi to‘rtta yo‘lovchi samolyotini egallab oldi. Ular ikkita laynerni Nyu-Yorkdagi Jahon savdo markazi minoralariga yo‘naltirdi, uchinchisi Pentagon binosiga borib urildi. To‘rtinchi avialayner yo‘lovchilari va ekipaji terrorchilardan samolyot boshqaruvini olib qo‘yishga urindi va samolyot Pensilvaniya shtatidagi dalaga quladi.

19 terrorchidan tashqari, 2977 kishi halok bo‘ldi, yana 24 kishi bedarak yo‘qoldi.

Teraktlardan keyin NATO qo‘shinlari Afg‘oniston va Pokistonda “Al-Qoida” va “Tolibon”ga qarshi qasos harakatlarini olib bordi, Amerika va ittifoqdoshlari qo‘shinlari Iroqqa kiritildi, oqibatda Saddam Husayn rejimi ag‘darildi va “Al-Qoida”ning bir qator yetakchilari, shu jumladan, Usama bin Laden yo‘q qilindi.

Bin Ladenning o‘limidan keyin 2011-yilda “Al-Qoida” yetakchisiga aylangan Ayman az-Zavohiriy Afg‘onistonda bir oycha avval AQSH aviazarbasi natijasida o‘ldirildi.