Qirg‘iziston bilan chegaradagi otishmada tojikistonlik chegarachi halok bo‘ldi

Qirg‘iziston bilan chegaradagi otishma vaqtida Tojikiston chegara xizmati xodimi halok bo‘ldi. Bu haqda Isfara markaziy kasalxonasiga tayanib, “Sputnik Tajikistan” xabar berdi.

Xabarga ko‘ra, yana ikki kishi jarohatlangan. “Jabrlanganlar intensiv terapiya bo‘limiga yotqizildi. Hozir ular shifokorlar nazoratida”, — dedi nashr manbasi.

Ayni vaqtda Asia-Plus yozishicha, Vorux jamoat kasalxonasi besh nafar yarador tojikistonlik askar haqida xabar bergan.

Tojikiston va Qirg‘iziston chegarasida 14-sentabr kuni ertalab otishma bo‘lib o‘tgan edi.

Qirg‘iziston chegara xizmati Botken viloyatining Buloqboshi qishlog‘ida tojik chegarachilari kelganini ma’lum qildi. Idora ma’lumotlariga ko‘ra, ular chegara uchastkasida jangovar pozitsiyalarni egallab, avval erishilgan kelishuvlarni buzgan, so‘ngra Qirg‘izistonning hududni tark etish haqidagi talablarini e’tiborsiz qoldirib, minomyotlardan o‘q uzgan.

Toshkent vaqti bilan soat 10:30 ga kelib, chegarada vaziyat keskinligicha qolmoqda, deya xabar qildi “Sputnik Qirg‘izistan”. Agentlik Tojikiston tomonini vaqti-vaqti bilan qirg‘iz chegarachilari pozitsiyalarini o‘qqa tutayotganlikda aybladi. Qirg‘iziston tomonida jabrlanganlar yo‘q.

O‘z navbatida, Isfara shahar hokimligi matbuot kotibi Zubaydullo Shomadovning ma’lum qilishicha, Kex mahallasi Vorux chegara hududidagi otishma mahalliy vaqt bilan 7:15 (Toshkent vaqti bilan 6:15) da boshlangan.

“Qirg‘iziston harbiy xizmatchilari hech qanday sababsiz ushbu hududda xizmat qilayotgan tojikistonlik chegarachilarning harbiy qismiga qarata o‘t ochdi. Mavjud vaziyatdan kelib chiqib, javob o‘ti ochildi”, — dedi u.

Tojikiston chegara xizmati hozir tomonlar vaziyatni barqarorlashtirish bo‘yicha muzokaralar olib borayotganini qayd etdi.