Еврокомиссия раҳбари Россияга қарши санкцияларни сақлаб қолишга ваъда берди

Евроиттифоқ Россияга санкциялар орқали босим ўтказишда давом этмоқчи ва ярашиш йўлларини қидиришни режалаштирмаяпти. Бу ҳақда Еврокомиссия раҳбари Урсула фон дер Ляйен маълум қилди, деб ёзади «РБК».

«Очиқ-ойдин айтмоқчиман: санкциялар сақланиб қолади. Биз учун хотиржамлик қидириш эмас, балки қатъиятимизни кўрсатиш вақти келди, буни аниқ тушуниб олишлари керак. Украинани молуявий қўллаб-қувватлаш масаласида ҳам худди шу нарса ўринли», — деди у.

Унинг ишонтиришича, Евроиттифоқнинг Украина билан бирдамлиги «барқарор бўлади». Унинг сўзларига кўра, Евроиттифоқ биринчи кунданоқ Украина томонида туриб, қурол-яроғ билан ёрдам бермоқда, молиявий кўмак тақдим этмоқда ва Россияга қарши «дунё гувоҳ бўлган энг кучли санкциялар»ни киритмоқда.

Фон дер Ляйеннинг фикрига кўра, Россия молиявий сектори аллақачон «ҳаётни таъминлаш қурилмаларига улаб қўйилган», чунки Россия банкларининг тўртдан уч қисми халқаро бозорлардан узиб қўйилган, бир мингга яқин халқаро компаниялар эса мамлакатни тарк этган.

Бундан ташқари, унинг таъкидлашича, Россияда машиналар ишлаб чиқариш ўтган йил кўрсаткичларига нисбатан 75 фоизга пасайган.

Шунингдек, у Россия ҳарбий саноати идиш ювиш машиналари ва совитгичлар чипларидан фойдаланаётганини даъво қилди. «Россия саноати харобалар ичида қолди», — деди фон дер Ляйен.

Апрелдаёқ у Ғарб санкциялари Россия иқтисодиёти барқарорлигига тобора кучлироқ таъсир ўтказаётганини, дефолт эса шунчаки «вақт масаласи» эканини айтганди.

Февраль охиридан буён АҚШ, Евроиттифоқ ва уларнинг иттифоқдошлари Украинадаги махсус операциялар туфайли, Россияга қарши санкцияларнинг бир нечта пакетини киритди. Чеклов чоралари Марказий банк, олтин-валюта захираалри, энг йирик банклар, импорт ва экспорт, энергетика сектори, россиялик бизнесменлар ва сиёсатчиларга тааллуқли бўлди.

Россия ҳукумати Ғарб санкцияларини ноқонуний деб ҳисоблайди. Путин уларни «тентакона ва мулоҳазасиз» деб атади. Шунингдек, Евроиттифоқ «санкция безгаги»дан кўрадиган бевосита талафот келаси йили 400 миллиард доллардан ошиши мумкинлигини ҳам айтди.

Европа дипломатияси раҳбари Жозеп Боррел Европани Россияга қарши санкциялар оқибатлари юзасидан стратегик жиҳатдан сабрли бўлишга чақирган эди.