Finlyandiya bosh vaziri Sanna Marinning ta’kidlashicha, Yevropa Ittifoqi energiya ta’minoti bo‘yicha Rossiyaning shantaji va yaqinlashib kelayotgan “uzoq qish”dan omon qoladi. Biroq ittifoq birlik, qat’iyat va jasoratni saqlab qolgan taqdirdagina buni amalga oshirishi mumkin. Bu haqda Euronews xabar bermoqda.
Rossiya bizga e’tiroz bildirishi, shantaj qilishi va tahdid qilishi mumkin, ammo biz taslim bo‘lmaymiz.Shuningdek, Marin o‘z nutqida Yevropa Ittifoqi duch kelayotgan muammolar, jumladan, Ukraina urushi, oshib borayotgan energetika inqirozi, inflyatsiya, tobora kuchayib borayotgan retsessiya, tabiiy ofatlar haqida ham so‘z yuritgan.Rossiyaning harakatlari G‘arbni har qachongidan-da ko‘proq birlashtirdi, Rossiya esa har qachongidan ham yolg‘iz.
Ukraina bizning yordamimiz bilan urushda g‘alaba qozonadi. Boshqa muqobil yo‘q. Bizning qalbimizda ukrainaliklar allaqachon g‘alaba qozongan.
Sanna Marin, Finlyandiya bosh vaziri
Bosh vazirning aytishicha, Yevropa Ittifoqining eng katta kuchi va inqirozlardan chiqishning yagona yo‘li — 27 ta a’zo davlat o‘rtasidagi o‘zaro ishonch va birlikdir.
O‘z urushi bilan Rossiya o‘z iqtisodiyotini va kelajagini buzmoqda. Rossiya bizning ishonchimizni sindirdi. Urush qachondir tugagan taqdirda ham bizning ishonchimiz uzoq vaqt tiklanmaydi.So‘nggi haftalarda Finlyandiya Rossiya fuqarolari uchun vizalarni taqiqlashni talab qildi. Chunki mamlakat Rossiya bilan 1300 kilometr uzunlikdagi quruqlik chegarasiga ega bo‘lib, rossiyaliklarning Yevropa Ittifoqiga kiruvchi kam sonli hududlaridan biri hisoblanadi.
Marinning fikricha, Yevropa Ittifoqi Moskvaga bundan ham kuchliroq sanksiyalar qo‘llashga tayyor bo‘lishi kerak.
Sanksiyalar oddiy rossiyaliklarning kundalik hayotida aks etishi kerak. Rossiya Ukrainada tinch aholini o‘ldirar ekan, rossiyalik sayyohlar Yevropada bemalol sayohat qilishlari umuman to‘g‘ri emas.Marin o‘z nutqi davomida Ukraina xalqining “jasur va bo‘ysunmas” xarakterini qayta-qayta maqtab, energetika inqirozi og‘irligi ostida blokning Ukrainani qo‘llab-quvvatlashi barbod bo‘lmasligi kerakligini aytdi.
Finlyandiya bosh vaziri so‘nggi oylardagi voqealar haqida fikr yuritar ekan, Yevropa Ittifoqi Rossiya yoqilg‘ilariga qattiq bog‘liqligi uchun “katta narx” to‘layotganini aytdi va buni o‘tmishdagi geosiyosiy xatolar bilan izohladi.
Rossiyaga nisbatan juda sodda bo‘lganimizni tan olishimiz kerak va Rossiya faoliyati haqidagi taxminlarimizni noto‘g‘ri g‘oyalar asosida qurganmiz.Boltiqbo‘yi davlatlari va Polsha, shuningdek, sovetlar hukmronligi ostida yashagan do‘stlarimizni diqqat bilan kuzatishimiz kerak edi.
Izoh (0)