Британия Мудофаа вазирлигининг кунлик ҳисоботида ёзилишича, Россиянинг Украинага бостириб кириши оқибатида Россия Федерацияси ҳарбий салоҳияти заифлашди.
Ҳисоботда айтилишича, Россиянинг Ғарбий ҳарбий округи таркибига кирувчи Биринчи гвардия танк армияси босқиннинг дастлабки босқичида катта йўқотишларга учраган ва Украина қўшинларининг қарши ҳужумига қадар ҳам тўлиқ тикланмаган, оқибатда мазкур бўлинма бошқа рус қўшинлари билан бирга Харьков вилоятидан олиб чиқилган.
Биринчи гвардия танк армияси Россия Қуролли Кучларининг элита бўлинмаларидан бири бўлиб, унинг вазифаси, хусусан, Москвани ҳимоя қилиш ва НАТО билан уруш бўлган тақдирда қарши ҳужумга ўтишдир. Украинадаги уруш ушбу армияни ҳам, Ғарбий ҳарбий округнинг бошқа бўлинмаларини ҳам заифлаштирган. Шу сабабдан Британия Мудофаа вазирлиги ҳисоб-китобларига кўра, НАТО билан можаро юзага келган тақдирда Россиянинг альянсга қаршилик кўрсатиш қобилияти пасайган. Ҳарбий салоҳиятни тиклаш йиллаб вақт олади, дейилади ҳисоботда.
Август ойи охирида Украина қуролли кучлари Херсон вилоятига, сентябрь ойи бошида Харьков вилоятига ҳужум бошлади. Харьков йўналишидаги ҳужум уруш бошидан бери энг муваффақиятлиси бўлди. Украина президенти Владимир Зеленский 12 сентябрь оқшомида Украина Қуролли кучлари икки ҳафтадан камроқ вақт ичида 6 минг квадрат километр ҳудуд устидан назоратни қайта тиклашга муваффақ бўлганини маълум қилди.
Изоҳ (0)