Birlashgan Millatlar Tashkiloti Bosh Assambleyasining 13-sentabr kuni ochiladigan 77-sessiyasi raisi Chaba Koroshi BMTni isloh qilishni davom ettirish tarafdori ekanini aytdi va Bosh Assambleya faoliyatini “ko‘proq natija olishga yo‘naltirishni” va’da qildi.
“Biz BMTni, jumladan, Bosh Assambleyani isloh qilish va o‘zgartirishni davom ettirishimiz hamda ishonch orqali hamkorligimizni mustahkamlashimiz kerak. Mening rahbarligim shiori shunday bo‘ladi: ‘Birdamlik, barqarorlik va ilm-fan orqali yechimlar”, — dedi Koroshi.
Uning so‘zlariga ko‘ra, bo‘lajak sessiyaning asosiy mavzusi “Bir-biriga bog‘liq muammolar uchun inqilobiy yechimlar” bo‘ladi.
BMT nizomiga muvofiq 1945-yilda tashkil etilgan BMT Bosh Assambleyasi tashkilotda markaziy o‘rinni egallab, asosiy maslahatchi, yo‘l-yo‘riq ko‘rsatuvchi va vakillik organi hisoblanadi.
BMT Nizomiga muvofiq Bosh Assambleya:
- Xavfsizlik Kengashining tavsiyasiga binoan BMT Bosh kotibini tayinlaydi;
- Xavfsizlik Kengashining doimiy bo‘lmagan a’zolarini va BMTning boshqa kengashlari va organlari a’zolarini saylaydi;
- BMT budjetini ko‘rib chiqadi va tasdiqlaydi hamda tashkilotga a’zo davlatlardan olinadigan moliyaviy badallar miqdorini belgilaydi.
BMT Bosh Assambleyasining 77-sessiyasi 20—26-sentabr kunlari Nyu-Yorkda bo‘lib o‘tadi. Bu yil yig‘ilish oflayn tarzda o‘tkaziladi, avvalgi ikki yilda COVID-19 pandemiyasi tufayli ayrim chiqishlar videomuloqot shaklida bo‘lgan.
Izoh (0)