Шимолий Кореяда хусусий гўзаллик салонлари ва сартарошхоналар ноқонуний пул ишлаш йўлларидан бири ва «индивидуализм»ни тарғиб қилувчи деб ҳисобланиб, оммавий равишда ёпилмоқда. Бу ҳақда Daily NK хабар бермоқда.
Маълум бўлишича, бу ҳаракат август ойининг охирларида бошланган.
Шимолий Кореяда хусусий сартарошлар ва гўзаллик салонлари расмий давлат ташкилотларидан фарқли равишда солиқ тўламайди. Солиқдан қочиш истаги кўплаб фуқароларни ноқонуний сартарошлик ва гўзаллик салонларини очишга ундади. Бу эса уларга яхшироқ пул топиш имкониятини берди.
Қайд этилишича, бундай хусусий ташкилотлар мамлакат ёшлари орасида машҳур. Сабаби у ерда ёшлар сочини хоҳлаган кўринишда олдириш имконига эга. Бироқ Шимолий Кореянинг давлат сартарошхоналарида мумкин бўлган соч турмаклари қатъий белгиланган.
Шу сабабли у ердан камроқ мижозлар, асосан, ўрта ёшли одамлар фойдаланади. Шунингдек, камбағал қатлам учун ҳам давлат сартарошхоналари қулай. Чунки нархлар нисбатан арзон.
Август ойи охирида Чонгжин полицияси уйларда ёки кўчаларда соч олишга фаол равишда тақиқ қўя бошлади.
Ҳукумат одамларни давлат сартарошхоналаридан фойдаланишга мажбурлаб, хусусий сартарошхоналарни йўқ қилмоқда, бу йўл билан аҳолидан давлат ғазнасига пул ундиришга интилмоқда.
Хусусан, шаҳар полицияси қоидани бузганларга нисбатан 100 минг вон жарима ва қоидабузарлик даражасига қараб жиноий жазо билан таҳдид қилмоқда.
Одамлар очликдан ўлаётган бир пайтда ҳукумат ўзининг аҳмоқлигини кўрсатиб, энди одамларнинг тирикчилигини ҳам олиб қўйяпти. Табиийки, аҳоли бунга қарши. Давлат халқдан ҳеч нарса сўрамай, аксинча улар ўзини ўзи эплаб яшаётганига шукр қилиши керак", - деган Daily NK нашрининг номи сир қолишини истаган манбаси.
Изоҳ (0)