“Maxsus operatsiya to‘laqonli urushga aylanib ketdi. Kuchlar va resurslarni safarbar qilish kerak”. Zyuganov — Ukrainadagi urush haqida

KPRF (Rossiya Federatsiyasi Kommunistik partiyasi) yetakchisi Gennadiy Zyuganov Rossiya Davlat dumasi kuzgi sessiyasining birinchi yalpi majlisida nutq so‘zlab, Ukrainadagi “maxsus operatsiya” to‘la-to‘kis urushga aylanib ketganini ma’lum qildi, deb yozadi Meduza.

KPRF yetakchisi qayd etishicha, Duma sessiyasi hali hech “bunday murakkab va keskin vaziyat”da ochilmagan. Uning so‘zlariga ko‘ra, Davlat dumasi ta’tilda o‘tkazgan ikki oy ichida vaziyat, shu jumladan, frontdagi holat ham “tubdan” o‘zgargan.

“Ukrainada natsistlar, banderovchilar, fashistlarga qarshi harbiy-siyosiy operatsiya to‘la-to‘kis urushga aylanib ketdi, u bizga amerikaliklar, NATOchilar va birlashgan Yevropa tomonidan e’lon qilindi… Urush va maxsus operatsiya bir-biridan tubdan far qiladi. Maxsus operatsiyani e’lon qilgandan keyin, to‘xtatish ham mumkin. Lekin urushni istasangiz ham to‘xtata olmaysiz. Oxirigacha borishingizga to‘g‘ri keladi. Urushning ikki xil yakuni bo‘ladi: yoki g‘alaba, yoki mag‘lubiyat”, — dedi u.

“Lekin har qanday urush javobni talab qiladi. Avvalo, kuchlar va resurslar maksimal darajada safarbar etilishi kerak. Jamiyat jipslashishi va asosiy birlamchi vazifalar aniqlab olinishi kerak”, — deya qo‘shib qo‘ydi siyosatchi.

Bundan tashqari, OAVlar, Rossiya va Ukraina Telegram-kanallari Zyuganovning yana bir gapidan iqtibos keltirmoqda, u ham, da’vo qilinishicha, Davlat dumasida aytib o‘tilgan. Bu gapi bilan u, go‘yoki Rossiyada “umumiy safarbarlik” e’lon qilishga da’vat etmoqda.

Nashr qayd etishicha, Kremldagilar zaxiradagi harbiylarni to‘liq yoki qisman safarbar etish masalasi muhokama qilinmayotganini aytmoqda. “Hozirgi paytda yo‘q, bu haqda gap bo‘lgani yo‘q”, — dedi Rossiya prezidenti matbuot kotibi Dmitriy Peskov jurnalistlarning tegishli savoliga javoban.

Avgust oxirida Ukraina Qurolli kuchlari Xerson viloyatida, sentabr boshida esa Xarkov viloyatida qarshi hujumga o‘tdi. Ikkinchi yo‘nalishda Ukraina harbiylari ikki hafta ichida ahamiyatli darajada muvaffaqiyatlarga erishdi, Rossiya esa urush boshidan buyon eng yirik mag‘lubiyatga uchradi.