КPRФ (Россия Федерацияси Коммунистик партияси) етакчиси Геннадий Зюганов Россия Давлат думаси кузги сессиясининг биринчи ялпи мажлисида нутқ сўзлаб, Украинадаги «махсус операция» тўла-тўкис урушга айланиб кетганини маълум қилди, деб ёзади Meduza.
КPRФ етакчиси қайд этишича, Дума сессияси ҳали ҳеч «бундай мураккаб ва кескин вазият»да очилмаган. Унинг сўзларига кўра, Давлат думаси таътилда ўтказган икки ой ичида вазият, шу жумладан, фронтдаги ҳолат ҳам «тубдан» ўзгарган.
«Украинада нацистлар, бандеровчилар, фашистларга қарши ҳарбий-сиёсий операция тўла-тўкис урушга айланиб кетди, у бизга америкаликлар, НАТОчилар ва бирлашган Европа томонидан эълон қилинди… Уруш ва махсус операция бир-биридан тубдан фар қилади. Махсус операцияни эълон қилгандан кейин, тўхтатиш ҳам мумкин. Лекин урушни истасангиз ҳам тўхтата олмайсиз. Охиригача боришингизга тўғри келади. Урушнинг икки хил якуни бўлади: ёки ғалаба, ёки мағлубият», — деди у.
«Лекин ҳар қандай уруш жавобни талаб қилади. Аввало, кучлар ва ресурслар максимал даражада сафарбар этилиши керак. Жамият жипслашиши ва асосий бирламчи вазифалар аниқлаб олиниши керак», — дея қўшиб қўйди сиёсатчи.
Бундан ташқари, ОАВлар, Россия ва Украина Telegram-каналлари Зюгановнинг яна бир гапидан иқтибос келтирмоқда, у ҳам, даъво қилинишича, Давлат думасида айтиб ўтилган. Бу гапи билан у, гўёки Россияда «умумий сафарбарлик» эълон қилишга даъват этмоқда.
Нашр қайд этишича, Кремлдагилар захирадаги ҳарбийларни тўлиқ ёки қисман сафарбар этиш масаласи муҳокама қилинмаётганини айтмоқда. «Ҳозирги пайтда йўқ, бу ҳақда гап бўлгани йўқ», — деди Россия президенти матбуот котиби Дмитрий Песков журналистларнинг тегишли саволига жавобан.
Август охирида Украина Қуролли кучлари Херсон вилоятида, сентябрь бошида эса Харьков вилоятида қарши ҳужумга ўтди. Иккинчи йўналишда Украина ҳарбийлари икки ҳафта ичида аҳамиятли даражада муваффақиятларга эришди, Россия эса уруш бошидан буён энг йирик мағлубиятга учради.
Изоҳ (0)