“Buyuk ipak yo‘li”… Qum barxanlarda uzun izlar qodirgancha ufqqa tomon intilib borayotgan karvonlar, adoqsiz cho‘lu biyobonlarda yo‘lchilarga mayoq va boshpana bo‘lgan karvonsaroylar, uzoq safar zahmatidan qo‘rqmay yo‘lga otlangan, ko‘kdagi yulduzlarga qarab yurar yo‘lini topolgan jasur sayyohlar.
“Buyuk ipak yo‘li” Samarqand turizm markazi bunyod etilishi bilan bu qadimiy kent hayotida yangi davr boshlandi, u butun Markaziy Osiyo mintaqasida ishbilarmonlik, madaniy, gastronomik va tibbiy turizmni rivojlantirishda katta salohiyatga ega bo‘lgan eng go‘zal maskan maqomiga erishdi. Umumiy hisobi qariyb 1200 ta xonani tashkil etgan sakkizta zamonaviy mehmonxonalar majmuadagi eng asosiy obyektlar sanaladi. Ularning har biri o‘ziga xos nomga va me’moriy yechimga egadir.
22-qavatli qilib qurilgan, 234 ta xona va ikki prezidentlik lojasiga ega bo‘lgan besh yulduzli Samarkand Regency Amir Temur mehmonxonasi buyuk sarkarda bobomiz Amir Temur nomi bilan atalgan bo‘lib, ayni paytda nufuzli LHW (The Leading Hotels of the World) assotsiatsiyasiga kirgan Markaziy Osiyo hududidagi yagona mehmonxona hisoblanadi. Ikkinchi besh yulduzli va 22-qavatli Silk Road by Minyoun mehmonxonasi nomi esa “Buyuk ipak yo‘li” sharafiga qo‘yilgan. Bu mehmonxona, yana bir buyuk ajdodimiz – falakiyotshunos olim, davlat arbobi, Samarqand hoqoni Mirzo Ulug‘bek nomi bilan atalgan to‘rt yulduzli Stars of Ulughbek by Lia Minyoun mehmonxonasi bilan birgalikda Minyoun Hospitality mehmonxonalar tarmog‘iga kiritilgan, bu o‘z o‘rnida yuqori darajadagi qulaylik va sifatli xizmatdan darak beradi. Savitsky Plaza nomli to‘rt yulduzli mehmonxona Nukus san’at muzeyi tashkilotchisi va direktori, taniqli rassom, restavrator va san’atshunos nomini ulug‘laydi.
Majmuaning janubiy qismida o‘z ichiga to‘rtta Wellness mehmonxonalarni olgan tibiiy klaster joylashgan. Ularning har biri tibbiy profilaktika, detoksatsiya, bo‘g‘imlar va umurtqani davolash, shuningdek nafas olish a’zolari kasalliklarini davolash yo‘nalishidagi muayyan tibiiy xizmatlarni ko‘rsatish uchun moslashtirilgan. Bu yerga tashrif buyuruvchi mehmonlarga to‘liq tibbiy ko‘rikdan o‘tish va individual sanator-davolash hamda tananing umumiy quvvatini oshirishga qaratilgan dasturlar taklif etiladi.
“Buyuk ipak yo‘li” sayyohlik markazi chiroyiga yarashib turgan “Boqiy shahar” tarixiy-etnografik majmuasi sharq me’morchiligining barcha o‘ziga xos etnik an’analarini yorqin ifodalovchi platforma hisoblanadi. Shundoqqina eshkak eshish kanali bo‘yida qad rostlagan “Abadiy shahar” o‘zbek milliy madaniyatining barcha rang-barangligi, go‘zalligi va an’analarini o‘zida mujassamlashtirgan. Bu yerda O‘zbekistonning turli viloyatlaridan kelgan hunarmandlar, mashhur amaliy san’at ustalari va rassomlarning galereya va ustaxonalari, milliy taomlar baayni maromiga yetkazib tayyorlanadigan tamaddixonalar joylashgan.
“Buyuk ipak yo‘li” majmuasi tarkibiga kiritilgan barcha mehmonxonalar o‘ziga xos va betakror bo‘lib, ularning har biri alohida dizayn va ko‘rinishga ega. Interyer va xonalarning dizayni zamonaviy tendensiyalar asosida, puxta ishlab chiqilgan. Mebel, yoritgichlar, xona ichi jihozlari va bezaklari Italiya, Avstriya, BAA, Turkiya davlatlari, shuningdek, MDHning butun dunyoda nufuzli sanalgan ishlab chiqaruvchilaridan xarid qilingan.
Muhayyo etilgan ajoyib yashash sharoitlaridan tashqari, mehmonlarning totli taomlardan tanovul qilishlari uchun ham keng imkoniyatlar yaratilgan. Mehmonxonalarda turli xalqlarning milliy taomlarini tayyorlab taqdim etuvchi bir nechta restoranlar ochilgan bo‘lib, ulardagi benazir taomlarning barchasi jahonga mashhur bo‘lgan oshpazlar tomonidan tayyorlanadi.
Mehmonxonalar va markaz to‘liq ishga tushirilgach, 1700 nafar kishi doimiy ish bilan ta’minlanadi, bu esa bandlik sohasida ijobiy natija hisoblanib, mahalliy yosh mutaxassislarga butun dunyo bo‘ylab besh yulduzli mehmonxonalarni boshqarib kelgan xorijiylik menejerlar tajribasini o‘zlashtirish uchun qulay imkon beradi. Bu jihatlar mutanosiblikda mehmonxona ishi jabhasida mutlaqo yangi standartni va benuqsonlik muhitini yaratadi.
Xonalar, zallar, restoranlar va SPA hududlarining interyeri sayohat va qadimiy karvon yo‘llari, sahroda paydo bo‘lgan saroylar va cho‘ldagi jilvagar saroblar, buyuk tarixiy bosqichlar ruhi bilan boyitilgan. Mehmonlar bu maskanlarda turli madaniyatlar uyg‘unligi, betakror karvonsaroy muhitini his etgan holda, iltifotli xodimlarning a’lo darajadagi xizmatlaridan foydalanishlari hamda sharqona lutf va mehmondo‘stlik shodiyonasiga oshno bo‘lishlari shubhasiz. Bu ko‘ngilli va yoqimli taassurotlar sayyohlar qalbini go‘zal va betakror Samarqandga talpintirib, qayta-qayta tashrifga undab turadi.
Yanada ko‘proq fotosuratlar bu yerda: https://drive.google.com/drive
Ma’lumotlar sheriklik huquqi asosida tayyorlandi
Izoh (0)