Gulnora Karimova boshchiligidagi jinoiy guruhning noqonuniy orttirilgan va xorijda legallashtirilgan 1 milliard 400 million AQSH dollari miqdoridagi mablag‘larini O‘zbekistonga qaytarish ishlari murakkab kechmoqda. Bu haqda adliya vaziri o‘rinbosari Muzraf Ikromov jurnalistlar bilan muloqotda ma’lum qildi, deya xabar bermoqda “Daryo” muxbiri.
Muzraf Ikromovning aytishicha, noqonuniy o‘zlashtirilgan boyliklarni O‘zbekistonga qaytarish bo‘yicha ko‘plab davlatlar bilan hamkorlikda ishlanmoqda.
“Gulnora Karimova va u boshchiligidagi jinoiy guruhning noqonuniy o‘zlashtirgan boyliklari umumiy hisobda 1 milliard 400 million AQSH dollariga teng. Bu milliy valyutada 15 trillion so‘m degani. Hisob-kitoblarga ko‘ra, buncha miqdordagi pullarga 1 ming 400 ta maktab qursa bo‘larkan. Masalan, 2020-2021-yillarda Fransiyada jinoiy guruhning ko‘chmas mulklari (2 ta katta qasr) sotilishi natijasida 20 million AQSH dollariga teng pul mablag‘i O‘zbekistonga qaytarildi”, – dedi vazirlik rasmiysi.
Tadbirda Belgiya qirolligida mazkur jinoiy uyushgan guruhga tegishli 240 million AQSH dollarilik aktivlar mavjudligi aytildi. Shu bilan birga, Buyuk Britaniyada Gulnora Karimova va uning sheriklariga tegishli bo‘lgan 10 million funt sterling va 3 ta ko‘chmas mulk masalasi London oliy sudida ko‘rib chiqilmoqda. Latviyada jinoiy guruhga tegishli 15 million AQSH dollariga teng mablag‘lar, 850 unsiya (26 kilogramm) oltin sertifikatlari hamda Riga shahrida joylashgan madaniy-ko‘ngilochar majmua bor.
Muzraf Ikromovning ta’kidlashicha, mablag‘larni O‘zbekistonga qaytarish jarayoni juda ham murakkab hisoblanadi.
“Ochig‘i, bu juda ham og‘ir jarayon. Lekin ko‘p davlatlar bilan hamkorlikda ishlayapmiz. Ularga kerakli dalillarni, sud qarorlarini (hukmlarini) ko‘rsatyapmiz. Asosiy maqsadimiz – O‘zbekistondan chiqib ketgan noqonuniy 1 milliard 400 million dollar mablag‘larning hammasini O‘zbekistonga qaytarish va mamlakatimizni rivojlantirishga ishlatish. Bu katta jarayon to‘xtamaydi. Masalan, faqat Shveysariyadan 131 million dollar miqdoridagi mablag‘larni qaytarish jarayoni 2 yil davom etdi. Harakatlar sekin-asta samarasini bermoqda. Bu pullar O‘zbekistonda eng muhim sohalarga sarflanishi ham juda katta nazoratga olinadi”, – dedi vazir o‘rinbosari.
Avvalroq Gulnora Karimova boshchiligidagi jinoiy guruh tomonidan noqonuniy orttirilgan va Shveysariyada legallashtirilgan 686 million dollar miqdoridagi mablag‘lar undirilishi bo‘yicha ishlar olib borilayotgani xabar qilingandi. Ayni paytgacha jinoiy guruhning Shveysariyadagi 336 million AQSH dollari miqdoridagi noqonuniy mablag‘lari uzil-kesil musodara qilingan. Shundan 131 million dollari 10 hafta ichida O‘zbekistonga qaytariladi. 205 million dollarni qaytarish bo‘yicha ishlar yakuniga yetmoqda. Hozirda qo‘shimcha 307 million AQSH dollari miqdoridagi mablag‘larni musodara qilish masalasi Shveysariya sudlarida ko‘rib chiqilmoqda.
Eslatib o‘tamiz, O‘zbekistonning birinchi prezidenti Islom Karimovning to‘ng‘ich qizi Gulnora Karimova 2015-yil avgustida besh yilga ozodlikdan mahrum qilingan. O‘sha vaqtda unga nisbatan yana bir jinoyat ishi bo‘yicha tergov davom etayotgan edi. Jamoatchilik bu haqda 2017-yil iyuliga kelibgina xabar topgan.
Gulnora Karimova 2019-yil martidan beri Toshkent viloyatining Zangiota tumanidagi 21-son umumiy tartibdagi koloniyada saqlanmoqda. 2019-yilning dekabr oyida jinoyatchiga nisbatan yana bir jinoyat ishi qo‘zg‘atilgan. Ya’ni u o‘lpon yig‘ish va qo‘rqitib, mulklarni tortib olishda ayblangan. 2020-yilning 8-yanvar kuni jinoyat ishlari bo‘yicha Toshkent shahar sudida Gulnora Karimova va boshqalarga oid jinoyat ishi bo‘yicha sud majlisi boshlandi. 2020-yil 18-mart kuni jinoyat ishlari bo‘yicha Toshkent shahar sudi sudlanuvchi Gulnora Karimovani jinoiy uyushma tashkil etish, tovlamachilik, o‘zlashtirish va rastrata yo‘li bilan talon-toroj qilish, jinoiy faoliyatdan olingan daromadlarni legallashtirish va boshqa jinoyatlarni sodir etganlikda aybli deb topgan va unga nisbatan 13 yil 4 oy muddatga ozodlikdan mahrum qilish jazosi tayinlagan. Jinoyat qonunchiligi normalariga muvofiq hamda bir necha jinoyat va hukmlar majmui bo‘yicha jazo tayinlanganligini inobatga olgan holda jazo muddatini 2015-yil 21-avgustdan boshlab hisoblash belgilangan.
Izoh (0)