Ijtimoiy tarmoqlarda Toshkent shahar Mirzo Ulug‘bek tumanida joylashgan 142-sonli maktabda ichki ishlar organlari xodimlari, maktab ma’muriyati hamda o‘quvchilar o‘rtasida o‘tkazilayotgan profilaktik suhbat jarayoni aks etgan video va fotosurat tarqalib, keng muhokamalarga sabab bo‘lgandi. Toshkent shahar xalq ta’limi bosh boshqarmasi bunga munosabat bildirdi.
Xabarda aytilishicha, ushbu holat Toshkent shahar xalq ta’limi bosh boshqarmasi ishchi guruhi tomonidan o‘rganilganda 10-sentabr kuni darsdan so‘ng, maktabning ma’naviyat xonasiga ta’lim muassasasi direktori M.Maraimova, ma’naviyat-ma’rifat ishlari bo‘yicha direktor o‘rinbosari V.Xusanova hamda sinf rahbarlari birgalikda Vazirlar Mahkamasining 2018-yil 15-avgustdagi 666-son qarorining 3-bobida keltirilgan talablariga rioya qilmagan (odob-axloq qoidalari, ta’lim dargohida o‘zini tutish tartiblarini buzgan, sochi 2-3 santimetrdan uzun bo‘lgan) yuqori sinf yigitlari taklif etilgan.
Taklif etilgan yuqori sinf o‘quvchilari bilan maktab direktori hamda profilaktika inspektor-psixologi tomonidan targ‘ibot-tashviqot ishlari olib borildi. Shuningdek, inspektor-psixolog tomonidan maktabning yuqori sinf o‘quvchilari orasida “Tig‘” tadbiri ham o‘tkazilgan.
“Tadbir chog‘ida o‘quvchining maktab sumkasidan qaychi topilgan. Topilgan qaychi inspektor-psixolog tomonidan barcha o‘quvchilarga namoyish qilingan holda, bunday kanselyariya qaychisi o‘ziga mo‘ljallangan maxsus g‘ilofda olib kelinishi kerakligi haqida tushuntirish ishlari olib borilgan, xolos. Afsuski, buni ayrim o‘quvchilarning ota-onasi noto‘g‘ri talqin etib, ijtimoiy tarmoqlarda foto va videolarni joylaganligi ma’lum bo‘ldi”, — deb qayd etilgan xabarda.
Toshkent shahar XTBB ta’lim sifati va samaradorligini oshirish yo‘lida qilinayotgan ishlarda ba’zi kamchilik va nuqsonlar ham kuzatilayotganini tan olgan holda, ta’lim muassasalarida o‘quvchilar xavfsizligini ta’minlash uchun ko‘rilayotgan bu kabi choralarning yomon tomoni yo‘qligi ta’kidlab o‘tgan.
“Ta’lim muassasalarida farzandingizning saboq olishi bilan birgalikda uning xavfsizligini ta’minlash uchun ko‘rilayotgan bu kabi choralarning nimasi yomon?! Yoki bu kabi tadbirlarni noto‘g‘ri talqin qilib, ustoz va pedagoglar sha’niga, o‘z farzandi tahsil olayotgan maktab haqida salbiy fikrlar uyg‘otishga urinishdan qanday foyda ko‘rish mumkin?! Agar Siz rostdan farzandingiz taqdiri, kelajagi haqida qayg‘ursangiz maktab ma’muriyati yoki o‘g‘il-qizingiz sinf rahbari bilan bog‘lansangiz xursand bo‘lardik”, — deyiladi munosabatda.
Mavzuga doir:
Izoh (0)