Andijonda tuman IIB profilaktika inspektori hamshira onasidan ish talab qilgan QVP mudirini urib, unga tan jarohati yetkazgani aytilmoqda. Bu haqda “Daryo” manbasi xabar bermoqda.
Aytilishicha, voqea 2022-yil 11-sentabr kuni soat 13:00 lar atrofida Andijon shahrining Eski shahar hududida yuz bergan.
Manbaning ma’lum qilishicha, Xalq deputatlari Andijon tuman kengashi deputati, “Bobog‘ozi” qishloq vrachlik punkti mudiri vazifasida ishlovchi Jahongir Qo‘chqorov profilaktika inspektori tomonidan yetkazilgan tan jarohati sabab Respublika shoshilinch tez tibbiy yordam ilmiy markazi Andijon filialiga yotqizilgan.
Ta’kidlanishicha, voqea yuz bergan kuni erta tongda Jahongir Qo‘chqorov o‘zi rahbarlik qilayotgan qishloq vrachlik punktida xodimlarga umumiy yig‘ilish o‘tkazgan.
“Yig‘ilishda barcha xodimlarga vazifalari tushuntirilib, ularga topshiriqlar berilgan. Shuningdek, topshiriqlarni o‘z vaqtida bajarmasdan bepisandlik qilayotganlar jazoga tortilishi bo‘yicha ogohlantirilgan. Lekin hech kimni haqorat qilmagan. Biroq u yerda avval katta hamshira, hozirda oddiy hamshira sifatida ishlab kelayotgan Z.A. IIBda ishlovchi o‘g‘liga qo‘ng‘iroq qilib, mudir jig‘iga tegayotganligini aytgan. Shuningdek, o‘g‘liga mudirni tartibga chaqirib qo‘yish kerakligini bildirgan.
Ayolning o‘g‘li va uning sherigi QVP mudirini ushlab, ‘Devonaboy’ masjidi oldiga olib borib, tanib bo‘lmaydigan darajada urgan. Unga tan jarohati yetkazgan. Hech kim yordam bermagan”, — deydi ismini sir qolishini istagan manba.
Yana bir manbaning aytishicha, QVP mudirining do‘pposlanishiga uning Z.A.dan ishga kech qolganligi sababli tushuntirish xati olgani sabab bo‘lishi mumkin.
Sog‘liqni saqlash boshqarmasi mutasaddilarining ma’lum qilishicha, ushbu holat yuzasidan huquq-tartibot organlari tomonidan tergovga qadar surishtiruv ishlari olib borilmoqda.
Izoh (0)