Ижтимоий тармоқларда Тошкент шаҳар Мирзо Улуғбек туманида жойлашган 142-сонли мактабда ички ишлар органлари ходимлари, мактаб маъмурияти ҳамда ўқувчилар ўртасида ўтказилаётган профилактик суҳбат жараёни акс этган видео ва фотосурат тарқалиб, кенг муҳокамаларга сабаб бўлганди. Тошкент шаҳар халқ таълими бош бошқармаси бунга муносабат билдирди.
Хабарда айтилишича, ушбу ҳолат Тошкент шаҳар халқ таълими бош бошқармаси ишчи гуруҳи томонидан ўрганилганда 10 сентябрь куни дарсдан сўнг, мактабнинг маънавият хонасига таълим муассасаси директори М.Мараимова, маънавият-маърифат ишлари бўйича директор ўринбосари V.Хусанова ҳамда синф раҳбарлари биргаликда Вазирлар Маҳкамасининг 2018 йил 15 августдаги 666-сон қарорининг 3-бобида келтирилган талабларига риоя қилмаган (одоб-ахлоқ қоидалари, таълим даргоҳида ўзини тутиш тартибларини бузган, сочи 2-3 сантиметрдан узун бўлган) юқори синф йигитлари таклиф этилган.
Таклиф этилган юқори синф ўқувчилари билан мактаб директори ҳамда профилактика инспектор-психологи томонидан тарғибот-ташвиқот ишлари олиб борилди. Шунингдек, инспектор-психолог томонидан мактабнинг юқори синф ўқувчилари орасида «Тиғ» тадбири ҳам ўтказилган.
«Тадбир чоғида ўқувчининг мактаб сумкасидан қайчи топилган. Топилган қайчи инспектор-психолог томонидан барча ўқувчиларга намойиш қилинган ҳолда, бундай канцелярия қайчиси ўзига мўлжалланган махсус ғилофда олиб келиниши кераклиги ҳақида тушунтириш ишлари олиб борилган, холос. Афсуски, буни айрим ўқувчиларнинг ота-онаси нотўғри талқин этиб, ижтимоий тармоқларда фото ва видеоларни жойлаганлиги маълум бўлди», — деб қайд этилган хабарда.
Тошкент шаҳар ХТББ таълим сифати ва самарадорлигини ошириш йўлида қилинаётган ишларда баъзи камчилик ва нуқсонлар ҳам кузатилаётганини тан олган ҳолда, таълим муассасаларида ўқувчилар хавфсизлигини таъминлаш учун кўрилаётган бу каби чораларнинг ёмон томони йўқлиги таъкидлаб ўтган.
«Таълим муассасаларида фарзандингизнинг сабоқ олиши билан биргаликда унинг хавфсизлигини таъминлаш учун кўрилаётган бу каби чораларнинг нимаси ёмон?! Ёки бу каби тадбирларни нотўғри талқин қилиб, устоз ва педагоглар шаънига, ўз фарзанди таҳсил олаётган мактаб ҳақида салбий фикрлар уйғотишга уринишдан қандай фойда кўриш мумкин?! Агар Сиз ростдан фарзандингиз тақдири, келажаги ҳақида қайғурсангиз мактаб маъмурияти ёки ўғил-қизингиз синф раҳбари билан боғлансангиз хурсанд бўлардик», — дейилади муносабатда.
Изоҳ (0)