Москва муниципал депутатлари Путиндан истеъфога чиқишни сўради

Москванинг Ломоносовский муниципал округи депутатлари кенгаши 8 сентябрь куни Россия президенти Владимир Путиндан истеъфога чиқишни сўради.

Москва муниципал депутатларининг президентга қаратилган мурожаатида айтилишича, ҳокимиятнинг алмашиб туриши мамлакат муваффақиятли ривожланиши учун муҳим, Путинда эса иккинчи муддатдан кейин «ҳамма нарса қандайдир нотўғри йўлдан кетган: ялпи ички маҳсулот икки баравар ошмади, энг кам иш ҳақида айтилган кўрсаткичгача ўсмади, Россиядан ақлли ва ишга лаёқатли одамлар оммавий равишда кетмоқда, ваъда қилинган барқарорликдан дарак ҳам йўқ».

«Сиз ва қўл остингиздагилар қўллайдиган дабдабали қуруқ гаплар узоқ вақтлар мобайнида бетоқатлик ва тажовузкорлик билан безатиб келинди, натижада мамлакатимиз охир-оқибат Совуқ уруш даврига тушиб қолди. Россиядан яна қўрқишни ва нафратланишни бошладилар, биз яна бутун дунёга ядро қуроли билан хавф соляпмиз», — дейилади Ломоносовский муниципал округи депутатлари мурожаатида.

Уларнинг хулоса қилишича, Путиннинг қарашлари ва унинг бошқарув модели «умидсиз даражада эскирган, Россия ва унинг инсоний салоҳияти ривожланишига тўсқинлик қилмоқда». Шу муносабат билан москвалик муниципал депутатлар Россия президентидан «ўзини эгаллаб турган лавозимидан озод қилиш»ни сўрамоқда.

8 сентябрь кунги мажлисида Ломоносовский округи депутатлари Москва мэри Сергей Собянинга қаратилган мурожаатномани ҳам қабул қилди. Улар Москвада маҳаллий ўзини ўзи бошқариш тизими деярли ишламаслигини, туман даражасида эса қўш ҳокимият юзага келганини, бу эса маҳаллий фуқаролар ва уларнинг вакилларининг ҳар қандай ташаббусларига тўсқинлик қилишини қайд этди.

Аввалроқ Санкт-Петербургнинг Смольнинское муниципал округи кенгаши депутатлари Путиндан истеъфо беришни талаб қилган, шу сабабли кейинроқ полицияга чақирилган эди.

«Бизнинг барча мурожаатларимиз аслида уларга қаратилмаган… Улар бизга жавоб бермаслигини биз тушуниб турибмиз… Бу кўпроқ, шу ерда, Россияда туриб, бўлаётган воқеалар учун қайғураётган россияликларга йўлланган мурожаатдир. Ҳар сафар биз уларга  ёлғиз эмасликларини, бу ерда биз ҳам борлигимизни кўрсатишга интиламиз, бизлар — юз бераётган воқеаларга қарши бўлганлар кўп. Бу, пропаганда айтаётганидек, ‘кам сонли сотқинлар’ эмас. Биз жуда кўпчиликмиз», — деди мурожаат муаллифларидан бири Никита Юферев.