Ijtimoiy tarmoqlarda Samarqand viloyatining Samarqand tumanidan oqib o‘tuvchi Darg‘om kanaliga yog‘li moddalar oqizilayotgani to‘g‘risida video murojaat tarqaldi. Viloyat Ekologiya va atrof-muhitni muhofaza qilish boshqarmasi o‘rganish ishlari olib borilganini ma’lum qildi.
Ekologiya va atrof-muhitni muhofaza qilish davlat qo‘mitasi raisi o‘rinbosari Jusipbek Kazbekov va Samarqand viloyat boshqarma boshlig‘i Himmat Oqbo‘tayev boshchiligida tuzilgan 6 ta ishchi guruh tomonidan 5 soat davomida Darg‘om kanali muhofaza qismida o‘rganishlar olib borishi natijasida Samarqand tumani “Andijoni” MFY hududida “Nurshod universal savdo” MCHJ tomonidan ishlatilgan texnik chiqindi moylarni oqizib kelayotgani ma’lum bo‘lgan.
Qayd etilishicha, mazkur korxona o‘z aybini yashirib, izlarni yo‘qotish maqsadida tashlanayotgan chiqindi moylari ustiga shoshma-shosharlik bilan tuproq sepib chiqqan. Ammo tuproq texnik moyga tezda singib, holatni yanada ayanchli va achinarliroq qilib ko‘rsatmoqda.
Ushbu korxona atrofida faoliyat yuritib kelayotgan dehqon fermerlar ham o‘z e’tirozlarini bildirib, ularning dehqonchilik qilishlariga ham bunday holat ko‘pdan beri, anchayin zarar yetkazib kelayotganini aytgan.
Ayni paytda mazkur holat yuzasidan qonunda belgilangan normalarga muvofiq tegishli choralar ko‘rish uchun dalolatnomalar rasmiylashtirilib, laboratoriya tahlillari uchun korxona hududi va uning atrofidan suv va tuproq namunalari olingan.
Izoh (0)