AQSH prezidenti Jo Bayden Amerika hukumati Rossiyani terrorizm homiysi bo‘lgan davlat deb tan olishi kerak, deb hisoblamaydi. Bu haqda Meduza xabar bermoqda.
Reuters agentligi muxbirining tegishli savoliga javob berar ekan, Amerika prezidenti: “Yo‘q”, — deb javob berdi. U o‘z pozitsiyasiga aniqlik kiritib o‘tirmadi.
Rossiya Ukraina hududiga bostirib kirganidan keyin Ukraina uning terrorizm homiysi bo‘lgan mamlakat sifatida tan olinishiga erishishga harakat qilishni boshlagandi.
Politico ma’lumotlariga ko‘ra, Rossiyaga shunday maqom berilishini AQSH Kongressi Vakillar palatasi spikeri Nensi Pelosi talab qilib turib olgan. Biroq Davlat departamenti bunga qarshi chiqdi va bu, xususan, Ukraina donini Qora dengiz orqali eksport qilish haqidagi bitimga putur yetkazadi, deb hisobladi.
Moskva Vashingtonni mamlakatga terrorizm homiysi maqomi berilgan taqdirda, bu ikki tomonlama aloqalarda “orqaga qaytmaslik nuqtasi” yuzaga kelishiga sababchi bo‘lishi haqida ogohlantirdi.
Ukrainada urush boshlanganidan keyin Litva va Latviya parlamentlari Rossiyani terrorizmni qo‘llab-quvvatlovchi mamlakat deb e’lon qilgandi.
Iyul oxirida AQSH Senati Davlat departamentini Checheniston, Gruziya, Suriya va Ukrainadagi voqealar munosabati bilan Rossiyani terrorizmning homiysi sifatida tan olishga chaqiruvchi rezolyutsiyani qabul qilgan edi.
Ukraina prezidenti Vladimir Zelenskiy amerikalik hamkasbi Jo Bayden bilan suhbatda Rossiyani terrorizmga homiylik qiluvchi davlat sifatida tan olishni so‘radi, deb yozgan edi Washington Post aprel oyida. Bunga javoban Bayden mazkur masalada aniq bayonotlar bermagan va rasmiy Moskvaga bosim o‘tkazishning turli yo‘llarini ko‘rib chiqishga tayyorligini ta’kidlagan.
Shu kungacha AQSH terrorizm homiysi sifatida to‘rtta davlatni tan olgan: Suriya (1979-yil dekabrda), Eron (1984-yil yanvarda), Shimoliy Koreya (2017-yil noyabrda) va Kuba (2021-yil yanvarda).
Boshqa davlatning terrorizm homiysi sifatida tan olinishi bu davlat bilan o‘zaro munosabatlarni qattiq cheklash, unga mudofaa tovarlarini eksport qilishni taqiqlash, ikki maqsadli mahsulotlar (ham fuqarolik mahsulotlari, ham qurol yaratishda ishlatiladigan) eksportini nazorat qilish, moliyaviy va boshqa cheklovlarni nazarda tutadi. Davlat departamenti veb-saytida aytilishicha, qaror, shuningdek, “terrorizmga homiylik qiluvchi davlatlar bilan savdo qilgan shaxslar va mamlakatlarni jazolaydigan boshqa sanksiyalar to‘g‘risidagi qonunlarni” kiritishni ham nazarda tutadi. Bu shuni anglatadiki, AQSH sanksiyalari iqtisodiyotning ayrim tarmoqlari bilan cheklanib qolmaydi, deya ta’kidladi Politico.
Izoh (0)