Британия ички ишлар вазири Прити Пател ҳукумат тепасига Лиз Трасс келганидан кейин истеъфога чиқди. Сиёсатчи ўз қарорини собиқ бош вазир Борис Жонсонга йўллаган мактубида маълум қилган.
Пател янги ҳукуматни қўллаб-қувватлашини, шунингдек, ўз ватанига хизмат қилишда давом этишини, лекин буни «орқа ўриндиқдан» (парламентнинг оддий аъзолари ўтирадиган жой) амалга оширишини ёзган.
«Мен Лиз Трассни янги раҳбар этиб сайлангани билан табриклайман ва уни янги бош вазир сифатида қўллаб-қувватлайман. Сўнгги уч йил давомида ички ишлар вазири бўлиб ишлаш мен учун шараф бўлди. Полицияни қўллаб-қувватлаш, иммиграция тизимимизни ислоҳ қилиш ва мамлакатимизни ҳимоя қилиш борасидаги ишларимиздан фахрланаман», — деди ички ишлар вазири Жонсонга йўллаган мактубида.
Прити Пател 2019 йил июлидан бери ички ишлар вазири лавозимида ишлаб келаётганди. Уни бу лавозимга Борис Жонсон тайинлаган.
5 сентябрь куни Лиз Трасс партиявий овоз бериш натижасида ҳукмрон Консерватив партия етакчисига айланди. Шу билан бирга у Борис Жонсоннинг ўрнига Британиянинг янги бош вазири бўлди.
Изоҳ (0)