Xitoy g‘arbidagi Sichuan provinsiyasida yuz bergan 6,8 magnitudali zilzila qurbonlari soni 46 kishiga yetdi.
Xitoy seysmologik tarmoqlar markazi ma’lumotlariga ko‘ra, yer silkinishlari Gardze-Tibet avtonom okrugi g‘arbida qayd etilgan. Zilzila o‘chog‘i 16 kilometr chuqurlikda, uning epitsentri Ludin uyezdidan 39 kilometr uzoqlikda joylashgan.
Mahalliy OAV ma’lumotlariga ko‘ra, bu hududga Ludin va yaqin atrofdagi aholi punktlaridan 530 nafar qutqaruvchilar yuborilgan.
Qurbonlar va vayronalar haqida xabarlar birin-ketin paydo bo‘la boshladi. Jumladan, Ganzi shahrida 29 kishi, Yaan shahrida 17 kishi halok bo‘lgan, 16 nafar fuqaro bedarak yo‘qolgan.
Xitoy rahbari Si Szinpin tabiiy ofatdan jabr ko‘rganlarni qutqarish uchun barcha imkoniyatlarni ishga solishga chaqirdi. Insonlarning hayotini saqlab qolish va qurbonlar sonini kamaytirish ustuvor vazifa ekanini ta’kidlagan Szinpin silkinishlarga tayyor turish va o‘ta ehtiyotkor bo‘lish zarurligini aytdi.
Falokat hududiga Ludindan 30 nafar va yaqin atrofdagi aholi punktlaridan yana 530 nafar qutqaruvchi jo‘natildi.
Ganzi-Tibet avtonom okrugi qutqaruv ishlarini olib borish uchun mintaqaga 635 nafar politsiya, o‘t o‘chirish, sog‘liqni saqlash, aloqa, elektr va transport xodimlarini jo‘natdi.
39 ming kishi zilzila markazidan 20 kilometr radiusda, 330 ming kishi — 50 kilometr, 1,55 million kishi 100 kilometr masofada istiqomat qiladi.
Sichuan provinsiyasi Xitoyning zilzila ehtimoli eng yuqori bo‘lgan mintaqalaridan biri sifatida tanilgan. 2008-yil may oyida bu yerda so‘nggi o‘n yilliklardagi eng katta — 8 magnitudali zilzila sodir bo‘lgandi. Oqibatda 87 150 kishi halok bo‘lgan yoki bedarak yo‘qolgan, 374 000 kishi jarohat olgan, bir necha million kishi boshpanasiz qolgan.
Izoh (0)