Ko‘plab xit taronalar ijrosi bilan muxlislar qalbidan joy olgan xonanda, “Sevinch”, “Kelgindi kuyov”, “Yondiradi, kuydiradi”, “Farhod va Shirin” kinofilmlarida aktrisa sifatida namoyon bo‘lgan Lola Yo‘ldosheva 4-sentabr kuni 37 yoshni qarshi oldi. Shu munosabat bilan “Daryo” xonandaning hayot va ijod yo‘li haqida ma’lumot beradi.
San’atga qiziqishi kuchli bo‘lgan huquqshunos
Lola Yo‘ldosheva 1985-yilning 4-sentabrida Toshkent shahrida tug‘ilgan. Uning otasi Ravshanbek Yo‘ldoshev uzoq yillar mobaynida ichki ishlar organlarida tergovchi sifatida faoliyat yuritgan. Shu bilan birga, uning san’atga qiziqishi baland bo‘lgan. Aynan shu qiziqish ortidan Ravshanbek Yo‘ldoshev keyinchalik ko‘plab yulduzlarni kashf qilgan “Tarona rekords” prodyuserlik kompaniyasiga asos solgan. Lola oilada to‘rt nafar farzandning to‘ng‘ichi bo‘lgan, ya’ni xonandaning Rustam ismli ukasi va Anora, Asal ismli singillari bor.
Aktrisa yoshligida ijtimoiy fanlarni katta qiziqish bilan o‘rganadi va Buyuk Britaniyadagi o‘rta maktabda tahsil oladi. Lola maktabni bitirganidan keyin Moskva xalqaro universitetida o‘qishga kiradi. Xonanda o‘qishni bitirgach, Toshkentga qaytadi va biznes sohasidagi bilimlarini mustahkamlash maqsadida poytaxtdagi Vestminster xalqaro universitetida o‘qiydi. So‘ngra Toshkent davlat yuridik universitetiga o‘qishini ko‘chiradi va oliy ma’lumotli yurist sifatida o‘qishni bitiradi.
Ijodiy faoliyatini reklama roligidan boshlagan
Lola o‘z ijodiy faoliyatini juda erta boshlagan. U o‘n yoshida “Shiribom” reklama roligi uchun o‘zining ilk taronasini ijro etgan. Lola 2002-yilda xonanda sifatida faoliyatini boshlaydi va “Netayin” nomli taronasini ijro etadi. Xonandaning ushbu taronasi ko‘p muddat xit taronalar safidan tushmaydi. U 2002-yilda rossiyalik prodyuserlar bilan shartnoma imzolaydi va bir muddat Mayya taxallusi ostida ijod qiladi.
Shundan keyin o‘zini aktrisalikda sinab ko‘rmoqchi bo‘lgan Lola 2003-yilda “Sevinch” nomli kinokartinada xonanda Shahzoda, aktyor Bobur Yo‘ldoshev bilan suratga tushadi va aktrisa sifatida taniladi. U shundan so‘ng “Muhabbatim”, “Topdim baxtimni”, “Imkon ber”, “Senga”, “Sog‘indim”, “Kel” taronasini muxlislariga taqdim etadi.
Xonanda ishtirokidagi “Kelgindi kuyov”, “Jodugar”, “Yondiradi, kuydiradi”, “G‘aroyib orzular” filmlari ham tomoshabinlarning e’tirofiga sazovor bo‘lgan.
Lola 2020-yilda Xitoy nashri tuzgan Markaziy Osiyoning eng go‘zal xonandalari ro‘yxatiga kiritilgan. Ushbu ro‘yxatdan ikki mashhur xonanda — Shahzoda va Rayhon ham joy olgan. Shuningdek, ro‘yxatda Qozog‘iston, Qirg‘iziston va Tojikistonning eng mashhur qo‘shiqchilari nomlari keltirilgan.
Ikkinchi turmushidan baxtini topgan
Aktrisa 2005-yilda “Tarona” mukofotlash marosimida “Yilning eng yaxshi ayol xonandasi” sifatida g‘olib deb topiladi. Shundan keyin xonanda turmushga chiqadi va ijodda tanaffus qilib, oilasiga vaqt sarflaydi. Lola “Topdim baxtimni” nomli taronasida birinchi turmush o‘rtog‘i bilan suratga tushgan. Oradan 6 yil o‘tib, 2011-yilda u turmush o‘rtog‘i bilan ajrashganini va ijodga qaytganini ma’lum qiladi.
Lola birinchi turmush o‘rtog‘i bilan sevishib turmush qurgani, biroq keyinchalik u tomondan qo‘yilgan turli taqiq va cheklovlar o‘zaro kelishmovchilik hamda oilaning buzilishiga sabab bo‘lgani haqida so‘zlab bergandi.
“Biz sobiq turmush o‘rtog‘im bilan tanishganimizda 18 yoshda edim. U meni turmushga chiqishga ko‘ndirish uchun bir yil ‘mehnat qildi’, bizning to‘yimizga tish-tirnog‘i bilan qarshi bo‘lgan ota-onamni ko‘ndirish uchun esa yana bir yil sarfladi. U hammamizni ko‘ndirish uchun barcha mahoratini ishga soldi. Shu tarzda oradan 2 yil o‘tib biz unga taslim bo‘ldik. Otam sobiq turmush o‘rtog‘imdan to‘ydan keyin o‘qishimni davom ettirishim hamda o‘tgan yillar mobaynida erishgan karyeramni davom ettirish va’dasini oldi. Erkaklar qo‘l tashlashdi, non sindirildi, to‘yimiz bo‘ldi.
Ota-onamnikiga bir haftada bir marta bir necha soatga borardim, yotib qolishga hech qachon ruxsat berishmasdi. Shunday qilib oradan yillar o‘tdi. Ikki farzandli bo‘ldim. Har kuni ertalab soat 6:00 da turardim, yarim kechasi uxlashga yotardim. Boshqalarning manfaatlari bilan yashardim, chunki o‘zimda hech qanday manfaat yo‘q edi. Hayotimdagi asosiy maqsad oila a’zolariga xizmat qilish, ularga yaxshi ko‘rinish edi. Har kecha uxlashdan oldin o‘zimni sahnada his etar, ko‘zlarim yonib tabassum qilayotganimni tasavvur qilardim. Faqat tushimda o‘zimni baxtli va erkin his etardim.
Haqiqiy Lolani sog‘inardim…
Kunlardan bir kun men 40 kunlik o‘g‘limni va ikki yoshli qizimni olib u uydan ketdim va u yerga boshqa hech qachon qaytmadim…
“O‘shanda men qo‘rqqanmidim? Yo‘q. Qilmishimdan afsuslandimmi? Hech qachon! Kimnidir ayblaymanmi? Bu ahmoqlik. Biz bilan bo‘layotgan hamma narsaga biz qachondir ruxsat berganmiz. Oradan 10 yil o‘tganidan so‘ng men bu haqda birinchi marta gapiryapman. Chunki qachondir men bosib o‘tgan hayotda yashayotgan ayollarning og‘rig‘ini tushunaman, sizning umidsizligingizni his etaman, oilangizni yo‘qotishdan, shu bilan birga, tubsiz jarlik yoqasida qolishdan qo‘rqishingizni bilaman.
Birga yashayotgan odamlaringizning harakatlarini oqlab, bu sizning taqdiringiz va siz hech narsani o‘zgartira olmasligingizga o‘zingizni ishontirayotganingiz, ota-onangiz yuzini yerga qaratmaslik uchun harakat qilayotganingizni his qilaman.
Siz juda ham istaydigan yagona narsa — to‘yib uxlash yoki hech bo‘lmasa biror marta hech kimdan ruxsat so‘ramasdan biror qarorni qabul qilish. Biroq siz bulardan ko‘prog‘iga loyiqsiz. Bu ajrashishga chaqiriq emas! Men uchun oilaviy qadriyatlar hamisha ustun bo‘lgan. Bu o‘zingizni hurmat qilishga chaqiriq! Siz shaxs ekanligingiz va o‘zingiz orzu qilgan hayotda yashashga to‘laqonli haqli ekanligingizni unutmang! Ha, siz kelin, rafiqa va onasiz, lekin birinchi navbatda siz o‘z haq-huquqlariga ega insonsiz hamda hech kim ularni oyoqosti qilish huquqiga ega emas.
Kimdir o‘zgarishi va hayotingiz yaxshilanishini kutmang. Bu o‘z-o‘zini aldash. O‘zgarishi mumkin bo‘lgan yagona inson — sizsiz. Men shu tarzda yumshoq fe’l-atvorli, ochiq, sodda va ishonuvchan qizdan kuchli, asosiysi, o‘zini sevadigan va hurmat qiladigan ayolga aylandim.
Biz qizlarimizga o‘rnak bo‘lamiz, shuni yodda tuting. O‘ziga hurmat bolalikdan boshlanadi. Bolalar o‘ziga ishonchi yuqori, o‘ziga qaragan, otasi sevadigan baxtli onani ko‘rishi kerak. Boshqacha bo‘lishi mumkin emas! Mening farzandlarim bugun meni shu holda ko‘ryapti.
Oradan yillar o‘tib, men turmush o‘rtog‘im siymosida baxtimni, sevgimni, erkimni, hurmat va qo‘llab-quvvatlashni topdim. Buning uchun undan minnatdorman. Endi siz bu shunchaki balandparvoz so‘zlar emas, balki mening hayotiy tajribam ekanligini bilasiz.
Men sizlarning har biringiz baxtli bo‘lishingizni juda xohlayman. Yana o‘zingizning hayotingizni sevishingiz, bu yashash uchun kurash emas, ajoyib yo‘l ekanligini yodda tutishingizni istardim. Bu yo‘lni qanday bosib o‘tishni faqat siz hal qilasiz”, — degan edi xonanda.
Shahnoza Mirziyoyevaning eng yaqin dugonasi va “Aqlvoy” telekanali madhiyasi ijrochisi
Xonanda Lola O‘zbekiston prezidenti Shavkat Mirziyoyevning qizi, Maktabgacha ta’lim sohasi siyosatini shakllantirish va yuritish bosh boshqarmasi boshlig‘i Shahnoza Mirziyoyevaning eng yaqin dugonalaridan biri hisoblanadi. Ularning do‘stligiga 15 yildan oshdi. Xonanda Lola 2021-yilning noyabr oyida Shahnoza Mirziyoyeva bilan tushgan suratini sahifasiga joylab, uni tug‘ilgan kuni bilan tabriklagan va samimiy tilaklarini bildirgan. Shuningdek, xonanda Shahnoza Mirziyoyeva bilan uzoq yillik qadrdon ekanligini aytib o‘tgan.
Lola Maktabgacha ta’lim vazirligining turli loyihalarida har doim dugonasi Shahnoza Mirziyoyeva bilan birgalikda, uni qo‘llab-quvvatlab turadi. Xususan, “Aqlvoy” telekanali ochilishiga bag‘ishlangan tadbirda ham xonanda dugonasining yonida edi.
Xonanda zararli odatlari haqida
Lolaning ham ko‘plab insonlar singari zararli odatlari bor. Xonanda muxlislariga atalgan postida punktuallik (o‘z vaqtida ulgurish) borasida ajralib turmasligi va ko‘pincha hamma joyga kechikib yurishiga iqror bo‘ldi, buni esa ishlarni doim keyinga qoldirishi bilan izohlagan edi. Bundan tashqari, qo‘shiqchi o‘zini qahvada cheklamasligini, bir kunda bu ichimlikdan ikki finjon ham ichishi mumkinligini qayd etgan edi. Shuningdek, Lola kir yuvish mashinasidan yuvib bo‘lingan kiyimlarni chiqarib yoyib qo‘yishni unutishi, ancha vaqtdan keyin esa ularni qaytadan yuvishi haqida yozgan edi.
Lola va Shahzoda o‘rtasidagi munosabat har doim muhokamalar markazida
Lolaning otasi Ravshan Yo‘ldoshev uning onasi Gulnora Yo‘ldosheva bilan ajrashib, Shahzodaga uylanganidan keyin xonandalar o‘rtasidagi munosabat yomonlashgani haqida uzoq yillar davomida mish-mishlar yuradi. Shahzoda ham, Lola ham turli intervyularda ular hech qachon bir-biriga ovozini balandlatib gapirmagani, oralarida jiddiy kelishmovchilik ham yo‘qligini ta’kidlab keladi. Lola Instagram sahifasi orqali muxlislarini qiziqtirgan savollarga javob berar ekan, Shahzoda bilan ayni paytda hech qanday munosabatda emasligini ma’lum qilgan.
Otasining vafot etganidan so‘ng ancha paytgacha o‘ziga kela olmagan
2020-yilning 31-mart kuni Lolaning otasi Ravshanbek Yo‘ldoshev yurak xurujidan vafot etdi. Xonanda o‘shanda oilasi bilan Rossiyaning Moskva shahrida edi. Pandemiya tufayli aviareyslar cheklangani bois Lola otasining ma’rakalariga kela olmadi. Xonanda otasining o‘limidan keyin ancha vaqtgacha o‘ziga kela olmagani haqida muxlislariga so‘zlab bergan edi.
“Otam sochining uchigacha intelligent odam edi. U eng aqlli, mehribon, nihoyatda iste’dodli inson edi. U har doim o‘zini og‘ir-bosiq tutar, past, yoqimli ovozda gapirardi. O‘ylashimcha, u javobini bilmaydigan bironta ham savol yo‘q edi. Har doim to‘g‘ri, dono maslahat berardi. Men har doim ijod va shaxsiy hayotga oid maslahatlarni undan so‘rardim. U har doim mening suyanchig‘im edi. U o‘zini sevardi, o‘ziga qarardi, har doim did bilan kiyinardi. Yana uning qo‘llari juda chiroyli edi. U tug‘ishimga kelishini aytgandi, men uni rosa kutayotgan edim. Biz u bilan o‘limidan bir kun avval gaplashgan edik. Ikkalamiz ham bu oxirgi marta ekanligini bilmagandik”, — degan edi Lola.
Lola 2022-yilning mart oyida plastik jarrohlik amaliyotini boshidan o‘tkazdi. U go‘zal bo‘lish uchun asli o‘zbekistonlik, ammo Moskvada faoliyat yuritayotgan mashhur plastik jarroh Timur Hidirovga murojaat qildi.
Har yili tug‘ilgan kunini har xil mamlakatda nishonlash an’anasi
Lola har yilgi tug‘ilgan kunini o‘zi uchun yangi shaharda nishonlashni odat qilgan. Xonanda 2021-yilning 4-sentabrida Shveysariyadagi kurortlardan birida 36 yoshini qarshi olgan bo‘lsa, bu yil u Rossiyaning Sankt-Peterburg shahriga shaxsiy bayramini nishonlash uchun jo‘nab ketdi.
“Qachonlardir har yili tug‘ilgan kunimni sayohatda nishonlashni niyat qilgandim. Ikki yildirki ushbu niyatimga erishmoqdaman. Yangi mamlakatlar, yangi men! Ushbu imkoniyat uchun Yaratgandan cheksiz minnatdorman”, — deydi xonanda.
Izoh (0)