2022 йилнинг учинчи чорагида дунёнинг 101 давлатида оммавий тартибсизликлар хавфи ортиб бормоқда. Бу ҳақда Британиянинг Verisk Maplecroft консалтинг компанияси ҳисоботига таяниб, Bloomberg агентлиги хабар берди.
Экспертлар хулосасига кўра, 198 мамлакатдан 101 тасида оммавий тартибсизликлар хавфининг ортиши қайд этилган, бу ҳисоб-китоблар бошланган 2016 йилдан бери энг катта чораклик ўсиш. Шу билан бирга, 42 та давлатда тартибсизликлар юз бериши хавфи камайган.
Bloomberg маълумотларига кўра, энергия нархининг ошиши фонида Европа Иттифоқи мамлакатларида тартибсизликлар учун замин яратилмоқда. Ривожланаётган мамлакатларда аҳолининг норозилиги озиқ-овқат нархининг ошиши ва глобал озиқ-овқат инқирозидан қўрқиш билан боғлиқ. Шунингдек, келгуси ойларда хавфлар кучайиши таъкидланган.
Европада куз ва қиш фасллари энергия инқирозини янада кучайтириб, яшаш нархини ошириши кутилмоқда. Дунёнинг кўп жойларида қурғоқчилик ва сув танқислиги озиқ-овқат нархларининг ошишига олиб келмоқда, бу эса энг кўп зарар кўрган ҳудудларда маҳаллий норозиликларни келтириб чиқариши мумкин.
Ижтимоий тартибсизликлар хавфи юқори бўлган мамлакатлар рўйхатига, хусусан, Германия, Кипр, Норвегия, Польша ва Украина киради. 2023 йилда тартибсизликлар Германия, Нидерландия, Швейцарияда ва бошқа мамлакатларда ортиши прогноз қилинмоқда.
Изоҳ (0)