AQSH sobiq prezidenti Donald Tramp Pensilvaniyada tarafdorlari oldidagi chiqishida mamlakatning amaldagi rahbari Jo Baydenni “davlat dushmani” deb atadi.
“U davlat dushmani... U va uning atrofida ‘Unday qil Jo, bunday qil’, deya uni boshqarayotgan guruh — davlat dushmani”, — deydi Tramp.
Sobiq prezidentning so‘zlariga ko‘ra, Baydenning nutqi “yovuzlik, nafrat va ixtilofga to‘la” edi.
Tramp Baydenning Donald Tramp va uning “Make America Great Again” (MAGA, “Amerikani yana buyuk qilish”) dasturini qo‘llab-quvvatlayotgan respublikachilarni “Amerika poydevoriga” tahdid soluvchi ekstremistik kuchlar vakili, deb atagan so‘zlariga shunday munosabat bildirdi.
“Biz demokratiyamizni saqlab qolishga harakat qilyapmiz, bu juda oddiy. Demokratiya uchun xavf o‘ngdan emas, radikal so‘ldan kelmoqda”, — deb javob berdi Tramp.
Tramp ham Bayden ham 2024-yilda bo‘lib o‘tadigan saylovlarda AQSH prezidentligiga nomzodini qo‘yishni rejalashtirayotgani haqida rasman e’lon qilmagan, biroq ikkalasi ham bunday imkoniyatni istisno etmagan. Ular o‘rtasidagi qarama-qarshilik so‘nggi paytlarda avj olgan.
Izoh (0)