АҚШ собиқ президенти Дональд Трамп Пенсильванияда тарафдорлари олдидаги чиқишида мамлакатнинг амалдаги раҳбари Жо Байденни «давлат душмани» деб атади.
«У давлат душмани... У ва унинг атрофида ‘Ундай қил Жо, бундай қил’, дея уни бошқараётган гуруҳ — давлат душмани», — дейди Трамп.
Собиқ президентнинг сўзларига кўра, Байденнинг нутқи «ёвузлик, нафрат ва ихтилофга тўла» эди.
Трамп Байденнинг Дональд Трамп ва унинг «Make America Great Again” (MAGA, «Американи яна буюк қилиш») дастурини қўллаб-қувватлаётган республикачиларни «Америка пойдеворига» таҳдид солувчи экстремистик кучлар вакили, деб атаган сўзларига шундай муносабат билдирди.
«Биз демократиямизни сақлаб қолишга ҳаракат қиляпмиз, бу жуда оддий. Демократия учун хавф ўнгдан эмас, радикал сўлдан келмоқда», — деб жавоб берди Трамп.
Трамп ҳам Байден ҳам 2024 йилда бўлиб ўтадиган сайловларда АҚШ президентлигига номзодини қўйишни режалаштираётгани ҳақида расман эълон қилмаган, бироқ иккаласи ҳам бундай имкониятни истисно этмаган. Улар ўртасидаги қарама-қаршилик сўнгги пайтларда авж олган.
Изоҳ (0)