Aliyev Armaniston bilan tinchlik shartnomasi qachon imzolanishini ma’lum qildi

Ozarbayjon prezidenti Ilhom Aliyev Ozarbayjon va Armaniston bir necha oy ichida tinchlik shartnomasini tayyorlab, imzolashi mumkinligini aytdi.

“Bir necha oy ichida tinchlik shartnomasini imzolashimiz mumkinligiga ishonaman”, — dedi u Italiyaning Il Sole 24 Ore gazetasiga bergan intervyusida.

Ozarbayjon prezidenti “agar Armaniston tomoni ham xuddi shunday istak bildirsa”, bu amalga oshadi, degan fikrda.

Aliyev Bryusselda 31-avgust kuni Yevropa Kengashi rahbari Sharl Mishel vositachiligida Armaniston bosh vaziri Nikol Pashinyan bilan bo‘lib o‘tgan muzokaralarda Ozarbayjon va Armaniston tashqi ishlar vazirlarining tinchlik kelishuvi bo‘yicha muzokaralarni boshlashi haqida kelishib olinganini aytdi.

Uning qo‘shimcha qilishicha, ko‘p narsa muzokaralarning borishi, “vaqt va suhbatlar mazmuni qanday bo‘lishiga” bog‘liq.

Aliyevning ta’kidlashicha, tinchlik shartnomasi Boku ilgari surgan va Yerevan tomonidan qabul qilingan beshta asosiy tamoyil asosida tuziladi.