Ukraina prezidenti Vladimir Zelenskiy ma’lum qilishicha, Rossiya Zaporojye AESga MAGATE missiyasi bilan birga kirmoqchi bo‘lgan mustaqil jurnalistlarni qo‘ymagan, deb yozadi Meduza.
“Biz Kiyevda MAGATE rahbari janob Grossi va missiya a’zolari bilan ko‘rishganimizda, missiyaga Ukraina va xalqaro OAVlar jurnalistlari albatta hamrohlik qilishi haqida kelishib olgandik. Mustaqil jurnalistlar. Dunyo haqiqatni ko‘rishi uchun. Nimalar yuz berayotganini ko‘rishi uchun. Afsuski, bu amalga oshirilmadi. Ammo shunday va’da berishgandi. Afsuski, istilochilar jurnalistlarni kiritmadi, biroq o‘z propagandachilaridan iborat ommaviy sahna tashkil qildi. Afsuski, MAGATE vakillari mustaqil OAVlar vakillarini himoya qilmadi”, — dedi Zelenskiy.
U MAGATE missiyasi stansiyada yuz berayotgan voqealar yuzasidan “xolisona xulosalar” chiqarishiga umid bildirdi. Shuningdek, tashkilot vakillaridan hozircha Zaporojye AESni qurolsizlantirish haqidagi chaqiriqlarni eshitmaganini ta’kidladi.
1-sentabr kuni urushning ilk kunlaridanoq Rossiya harbiylari nazorati ostida bo‘lib turgan Zaporojye AESga Xalqaro atom energiyasi agentligi (MAGATE) missiyasi yetib keldi, u Yevropaning eng yirik atom elektr stansiyasida vaziyatni baholashi kerak. Stansiyaning ko‘zdan kechirilishi aks etgan lavhalar Rossiya davlat agentliklari tomonidan e’lon qilindi.
Stansiya tashkilot tomonidan ko‘zdan kechirilganidan keyin, uning rahbari Rafael Grossi missiyaning bir nechta a’zolari u yerda qolib ishni davom ettirishini ma’lum qildi.
MAGATE missiyasi tashrifidan oldin Rossiya Mudofaa vazirligi Ukrainani stansiyani egallab olishga urinishda ayblagandi.
ZAES va Energodar shahri muntazam ravishda o‘qqa tutilib keladi. Ukraina va Rossiya buni bir-biriga to‘nkaydi. AESning ukrainalik xodimlari Rossiya xavfsizlik kuchlari ularni hibsga olib, qiynoqlarga solgani va MAGATE inspektorlaridan stansiya xavfsizligi uchun risklarni yashirishni talab qilgani haqida jurnalistlarga so‘zlab bergan.
Izoh (0)