Argentina vitse-prezidenti Kristina Fernandes de Kirshnerga o‘z uyi yonida tarafdorlari bilan salomlashayotgan paytida suiqasd uyushtirildi, deb yozadi Meduza.
Hodisa aks etgan videolarda bir odam uning yuziga to‘pponcha qaratib tepkini bosganini, ammo u otilmay qolganini ko‘rish mumkin.
Hujum qilgan shaxs qo‘lga olindi. U Braziliya fuqarosi Fernandu Andre Sabag Montiyel bo‘lib chiqdi, u ilgari qonun bilan bog‘liq muammolarga uchramagan. U Argentinaning Bersa rusumli to‘pponchasidan foydalangan.
Uning qanday maqsadni ko‘zlagani hozircha noma’lum.
Argentina prezidenti Alberto Fernandes ma’lum qilishicha, qurol beshta o‘q bilan to‘ldirilgan, ammo otilmay qolgan. Fernandes suiqasdni Argentinada 1983-yilda “demokratiya tiklanganidan buyon yuz bergan eng jiddiy hodisa” deb atadi.
69 yoshli Kristina Fernandes de Kirshner 2007—2015-yillarda Argentina prezidenti bo‘lgan. U korrupsiya haqidagi ish bo‘yicha ayblanuvchi sifatida qatnashmoqda, o‘tgan hafta prokuror uni 12 yilga ozodlikdan mahrum qilish va davlat lavozimlarini egallashni umrbod taqiqlashni so‘raganidan keyin, uning tarafdorlari uyining yonida navbatchilik qilmoqda. Siyosatchi har kuni uyidan chiqishda va uyiga qaytishda tarafdorlari bilan salomlashardi va dastxat yozib berardi. Uning uyi yonida ko‘plab politsiyachilar bo‘lgan, ammo Kirshnerning tarafdorlari bilan to‘qnashuvlardan keyin ularning soni qisqartirilgandi.
Izoh (0)