Vladimir Putin Rossiya qo‘shinlariga 15-sentabrga qadar Donetsk viloyatining ma’muriychegaralariga chiqish haqida buyruq bergan. Bu haqda brifingda Ukraina Qurolli kuchlari Bosh shtabi Bosh tezkor boshqarmasi boshlig‘i Aleksey Gromov ma’lum qildi, deb yozadi Meduza.
“Dushman tomon Xarkov, Lugansk, Donetsk, Zaporojye, Xerson va Nikolayev viloyatlarida bosib olingan tumanlarni ushlab turishda davom etmoqda, shuningdek, hujumga o‘tishni qayta boshlash uchun qulay sharoitlar yaratishga intilmoqda. Xususan, Rossiya istilochi qo‘shinlari Putinning 15-sentabrgacha Donetsk viloyati ma’muriy chegaralariga chiqish bo‘yicha buyrug‘iga muvofiq o‘z rejalari va harakatlarini navbatdagi marta muvofiqlashtirmoqda”, — dedi Gromov.
Uning so‘zlariga ko‘ra, Ukraina sharqida faol hujumga o‘tishni qayta boshlash uchun Rossiya Mudofaa vazirligi uchinchi armiya korpusi qo‘shilmalari va harbiy qismlarini qaytadan guruhlashni davom ettirmoqda. U 2022-yil yozida Rossiyaning turli hududlarida tanlab olingan ko‘ngilli bo‘linmalardan iborat.
Rossiya qo‘shinlarining Donbassdagi so‘nggi yirik muvaffaqiyati Severodonetsk — Lisichansk — Rubejnoye aglomeratsiyasining va umuman Lugansk viloyati hududining nazorat ostiga olinishi bo‘lgandi. Bu iyul boshida yuz bergandi.
Izoh (0)