Polsha Germaniyadan Ikkinchi jahon urushida yetkazilgan zarar uchun 6,2 trillion zlotiy (taxminan 1,3 trillion dollar) talab qiladi, bu haqda “Huquq va adolat” hukmron partiyasi rahbari Yaroslav Kachinskiy ma’lum qildi, deb yozadi “RBK”.
“Zarar qiymati sifatida keltirilgan summa — 6 trillion 200 milliard zlotiy”, — dedi Kachinskiy. Uning so‘zlariga ko‘ra, summa “eng konservativ usul”da hisoblab chiqilgan bo‘lib, aslida bundan ko‘p ham bo‘lishi mumkin edi.
Shuningdek, siyosatchi ko‘rsatilgan summa Germaniya iqtisodiyoti uchun “mutlaqo maqbul” ekani va unga “hech qanaqasiga og‘ir yuk bo‘lib tushmasligi” haqida fikr bildirdi. Kachinskiy aniqlik kiritishicha, summaning katta qismini “5,2 million Polsha fuqarolarining halokati uchun tovon puli” tashkil qiladi.
Kachinskiyning so‘zlariga ko‘ra, reparatsiya (urushda ko‘rilgan zararni qoplash uchun yengilgan va urush chiqishiga sabab bo‘lgan davlat tomonidan yenggan davlatga to‘lanadigan tovon)ni qo‘lga kiritish yo‘li uzoq davom etadi, ammo Varshava muvaffaqiyatga erishadi.
Polsha seymining reparatsiyalar bo‘yicha maxsus komissiyasi 2017-yilda Ikkinchi jahon urushi yillarida Germaniya tomonidan mamlakatga yetkazilgan zararni 48,8 milliard dollarga baholagandi. Biroq 2018-yil martida summa bir necha marta oshirildi va u 850 milliard dollarga yetdi. 20 kundan keyin Varshava uni 543 milliard dollargacha pasaytirdi.
O‘sha yili oktabrda Polsha hukumati reparatsiya summasini “yangi texnologiya bo‘yicha” qayta hisoblab chiqishini ma’lum qildi. Germaniya hukumati Ikkinchi jahon urushi uchun javobgarlikni tan olsa-da, ular Polsha seymining 1953-yilgi rezolyutsiyasini pesh qilib, Polshaga bir necha marta reparatsiyalarni rad etgan. O‘sha hujjatda Varshava Germaniya federativ respublikasi zararni qoplash bo‘yicha barcha majburiyatlarini bajarganini ma’lum qilgandi. Bundan tashqari, 1991-yilda Berlin ahil qo‘shnichilik haqidagi bitim doirasida yana 1,3 milliard yevro to‘lab bergan edi.
Polsha mudofaa vaziri Mariush Blashchak 2019-yilda seymning 1953-yilgi qarori suveren bo‘lmaganini aytib, kompensatsiyalar to‘lanmaganligida Rossiyani ayblagandi.
Izoh (0)