Украина президенти Владимир Зеленский маълум қилишича, Россия Запорожье АЭСга МАGATE миссияси билан бирга кирмоқчи бўлган мустақил журналистларни қўймаган, деб ёзади Meduza.
«Биз Киевда МАGATE раҳбари жаноб Гросси ва миссия аъзолари билан кўришганимизда, миссияга Украина ва халқаро ОАВлар журналистлари албатта ҳамроҳлик қилиши ҳақида келишиб олгандик. Мустақил журналистлар. Дунё ҳақиқатни кўриши учун. Нималар юз бераётганини кўриши учун. Афсуски, бу амалга оширилмади. Аммо шундай ваъда беришганди. Афсуски, истилочилар журналистларни киритмади, бироқ ўз пропагандачиларидан иборат оммавий саҳна ташкил қилди. Афсуски, МАGATE вакиллари мустақил ОАВлар вакилларини ҳимоя қилмади», — деди Зеленский.
У МАGATE миссияси станцияда юз бераётган воқеалар юзасидан «холисона хулосалар» чиқаришига умид билдирди. Шунингдек, ташкилот вакилларидан ҳозирча Запорожье АЭСни қуролсизлантириш ҳақидаги чақириқларни эшитмаганини таъкидлади.
1 сентябрь куни урушнинг илк кунлариданоқ Россия ҳарбийлари назорати остида бўлиб турган Запорожье АЭСга Халқаро атом энергияси агентлиги (МАGATE) миссияси етиб келди, у Европанинг энг йирик атом электр станциясида вазиятни баҳолаши керак. Станциянинг кўздан кечирилиши акс этган лавҳалар Россия давлат агентликлари томонидан эълон қилинди.
Станция ташкилот томонидан кўздан кечирилганидан кейин, унинг раҳбари Рафаэл Гросси миссиянинг бир нечта аъзолари у ерда қолиб ишни давом эттиришини маълум қилди.
МАGATE миссияси ташрифидан олдин Россия Мудофаа вазирлиги Украинани станцияни эгаллаб олишга уринишда айблаганди.
ЗАЭС ва Энергодар шаҳри мунтазам равишда ўққа тутилиб келади. Украина ва Россия буни бир-бирига тўнкайди. АЭСнинг украиналик ходимлари Россия хавфсизлик кучлари уларни ҳибсга олиб, қийноқларга солгани ва МАGATE инспекторларидан станция хавфсизлиги учун рискларни яширишни талаб қилгани ҳақида журналистларга сўзлаб берган.
Изоҳ (0)