Rossiya prezidenti Vladimir Putin Uzoq Sharqqa safari chog‘ida “Vostok-2022” strategik mashg‘ulotlarining faol bosqichiga tashrif buyuradi. Bu haqda uning matbuot kotibi Dmitriy Peskovga tayanib “Vedomosti” xabar qildi.
Qayd etilishicha, Rossiyada 1—7 sentabr kunlari “Vostok-2022” keng ko‘lamli qo‘mondonlik-shtab o‘quv mashg‘ulotlari bo‘lib o‘tadi. Mashg‘ulotlar davomida Sharqiy mintaqada harbiy xavfsizlikni ta’minlash uchun qo‘shinlar guruhlarini qo‘llash masalalari ishlab chiqiladi.
“6-sentabr kuni u Vladivostokning o‘zida ishlaydi. U yerda qurolli kuchlarning ‘Vostok-2022’ strategik qo‘mondonlik-shtab o‘quv mashg‘ulotlari boshlanadi. Prezident shu kuni ushbu strategik mashg‘ulotlarning faol bosqichiga tashrif buyuradi”, — dedi Peskov.
Mashg‘ulotlar Sharqiy harbiy okrugining “Bidjanskiy”, “Burduniy”, “Anna Bay” poligonlari, shuningdek, Oxot dengizi va Yaponiya dengizining suvlari va qirg‘oqbo‘yi hududlarida bo‘lib o‘tadi. Mashqlar Qurolli Kuchlar Bosh shtabi boshlig‘i Valeriy Gerasimov boshchiligida o‘tkaziladi. Mashg‘ulotlarga jalb qilingan kuchlar sentabr oyi oxirigacha doimiy joylashtirish punktlariga qaytadi.
Putin oxirgi marta harbiy mashg‘ulotlarga fevral oyida, Rossiya—Belarus o‘quv mashg‘ulotlarining faol bosqichida “Ittifoqchilar qarori 2022” vaqtida kelgan edi. Mashqlar respublikaning beshta poligonida bo‘lib o‘tgan: “Gojskiy”, “Brestskiy”, “Domanovskiy”, “Osipovichskiy” va “Obuz-Lesnovskiy”. Mashg‘ulotlarda Belarus prezidenti Aleksandr Lukashenko ham ishtirok etgan.
Avgust oyi oxirida Rossiya harbiy-dengiz kuchlari va Xitoy harbiy-dengiz kuchlari “Vostok-2022” mashg‘ulotlari doirasida Yaponiya dengizining shimoliy va markaziy qismlarida o‘zaro hamkorlikni ishlab chiqishlari ma’lum bo‘lgan.
Izoh (0)