Россия президенти Владимир Путин Узоқ Шарққа сафари чоғида «Восток-2022» стратегик машғулотларининг фаол босқичига ташриф буюради. Бу ҳақда унинг матбуот котиби Дмитрий Песковга таяниб «Ведомости» хабар қилди.
Қайд этилишича, Россияда 1—7 сентябрь кунлари «Восток-2022» кенг кўламли қўмондонлик-штаб ўқув машғулотлари бўлиб ўтади. Машғулотлар давомида Шарқий минтақада ҳарбий хавфсизликни таъминлаш учун қўшинлар гуруҳларини қўллаш масалалари ишлаб чиқилади.
«6 сентябрь куни у Владивостокнинг ўзида ишлайди. У ерда қуролли кучларнинг ‘Восток-2022’ стратегик қўмондонлик-штаб ўқув машғулотлари бошланади. Президент шу куни ушбу стратегик машғулотларнинг фаол босқичига ташриф буюради», — деди Песков.
Машғулотлар Шарқий ҳарбий округининг «Биджанский», «Бурдуний», «Анна Бай» полигонлари, шунингдек, Охот денгизи ва Япония денгизининг сувлари ва қирғоқбўйи ҳудудларида бўлиб ўтади. Машқлар Қуролли Кучлар Бош штаби бошлиғи Валерий Герасимов бошчилигида ўтказилади. Машғулотларга жалб қилинган кучлар сентябрь ойи охиригача доимий жойлаштириш пунктларига қайтади.
Путин охирги марта ҳарбий машғулотларга февраль ойида, Россия—Беларусь ўқув машғулотларининг фаол босқичида «Иттифоқчилар қарори 2022» вақтида келган эди. Машқлар республиканинг бешта полигонида бўлиб ўтган: «Гожский», «Бресцкий», «Домановский», «Осиповичский» ва «Обуз-Лесновский». Машғулотларда Беларусь президенти Александр Лукашенко ҳам иштирок этган.
Август ойи охирида Россия ҳарбий-денгиз кучлари ва Хитой ҳарбий-денгиз кучлари «Восток-2022» машғулотлари доирасида Япония денгизининг шимолий ва марказий қисмларида ўзаро ҳамкорликни ишлаб чиқишлари маълум бўлган.
Изоҳ (0)