Andijon shahridagi Alisher Navoiy nomidagi madaniyat va istirohat bog‘ining yozgi amfiteatrida O‘zbekiston mustaqilligining 31 yilligiga bag‘ishlangan tantanali bayram tadbiri bo‘lib o‘tdi. Bu haqda “Daryo” muxbiri Umidjon Mamarasulov xabar bermoqda.
“Yangi O‘zbekistonda el aziz, inson aziz!” shiori ostida o‘tkazilgan badiiy-musiqiy, teatrlashtirilgan bayram tadbirida viloyatning barcha tuman va shaharlaridan taklif etilgan davlat, jamoat tashkilotlari, ta’lim muassasalari vakillari, mehnat faxriylari, faol yoshlar ishtirok etdi.
Tadbir avvalida Andijon viloyati hokimi Shuhrat Abdurahmonov so‘zga chiqib, tantana qatnashchilarini va ularning timsolida barcha andijonliklarni mustaqillikning o‘ttiz bir yilligi bilan qutladi.
Hokimning qayd etishicha, joriy yilda viloyatda umumiy qiymati 890 milliard so‘m bo‘lgan 167 ta investitsiya loyihasi amalga oshirilib, qariyb 9 ming ta yangi ish o‘rni yaratilgan. Bayram arafasida shunday obyektlarning 120 tasi foydalanishga topshirilgan.
Ta’kidlanishicha, joriy yilda ta’lim muassasalarining infratuzilmasini yaxshilash uchun qariyb 300 milliard so‘mga yaqin mablag‘lar hisobiga 18 ta davlat maktabgacha ta’lim tashkilotlari, 26 ta maktabda qurilish-ta’mirlash ishlari bajarilgan.
Shuningdek, bog‘cha yoshidagi bolalar qamrovini oshirish maqsadida yil boshidan buyon 112 ta nodavlat bog‘chalar tashkil etilgan.
Bayram tabrigidan so‘ng O‘zbekiston mustaqilligining o‘ttiz bir yilligi munosabati bilan faxriy unvon, orden va medallar bilan taqdirlangan andijonliklarga yuksak davlat mukofotlari topshirilgan.
Shuningdek, 48 nafar tashabbuskor fuqaro va jamoatchilik tuzilmalari vakillari “Mahalla iftixori” ko‘krak nishoni bilan taqdirlanganlarga ko‘krak-nishonlari hamda bir yo‘la to‘lanadigan pul mukofoti hamda sanatoriylarda davolanish uchun bir martalik bepul yo‘llanmalar berilgan.
Bayram dasturida millatlararo do‘stlik, Yangi Andijon shaharchasidagi bunyodkorlik ishlari asosiy mavzuga aylandi. Qoraqalpoq, rus, uyg‘ur va qirg‘iz tillarida taronalar yangrab, qardosh xalqlarning raqslari ijro etildi.
Kechaning badiiy qismida andijonlik san’atkorlar “Nihol” davlat mukofoti sovrindorlari Shohida Nurmatova, Abror Azizov, A’zamjon Sultonov, estrada yulduzlari Jasur Mavlonov, Imron, O‘zbekistonda xizmat ko‘rsatgan artistlar Feruza Jumaniyozova va Ziyoda Qobilova hamda “Bojalar” guruhi solisti Jahongir Poziljonovning qo‘shiqlari barchani davraga chorladi.
Tantanali marosim 10 daqiqa davom etgan bayram mushakbozligi bilan yakunlandi.
Izoh (0)