O‘zbekiston va Misr farmatsevtika sohasida investitsiya loyihalarini amalga oshirishi mumkin

1-sentabr kuni tashqi ishlar vaziri vazifasini bajaruvchi Vladimir Norov Misrning O‘zbekistondagi elchisi Amira Fahmini qabul qildi. Bu haqda TIV axborot xizmati xabar qildi.

Qayd etilishicha, uchrashuvda O‘zbekiston—Misr hamkorligi barcha sohalarda jadal rivojlanib borayotgani ta’kidlangan. Oliy darajada erishilgan kelishuvlarni o‘z vaqtida va sifatli amalga oshirish yuzasidan tomonlar birgalikda choralar ko‘rishga tayyorligi ma’lum qilingan.

Bo‘lajak tadbirlar jadvali, xususan, Savdo-iqtisodiy hamkorlik bo‘yicha O‘zbekiston—Misr Hukumatlararo komissiyasining yig‘ilishi va ikki mamlakat tashqi ishlar vazirliklari o‘rtasida maslahatlashuvlarining navbatdagi davrasi bilan bog‘liq masalalar ko‘rib chiqilgan.

Iqtisodiy diplomatiyani faollashtirish istiqbollari, jumladan, ishbilarmon doiralarning bevosita aloqalarini rag‘batlantirish, biznes forumlarni tashkil etish, to‘qimachilik, qishloq xo‘jaligi, farmatsevtika va boshqa sohalarda investitsiya loyihalarini amalga oshirish bo‘yicha fikr almashilgan.

Birlashgan Millatlar Tashkiloti, Islom hamkorlik tashkiloti va Shanxay hamkorlik tashkiloti doirasidagi tomonlarning o‘zaro munosabatlariga alohida e’tibor qaratilgan.

Misr delegatsiyasining Samarqand shahrida bo‘lib o‘tadigan SHHT sammitida ishtirokiga doir tashkiliy jihatlar muhokama qilingan.