1 сентябрь куни ташқи ишлар вазири вазифасини бажарувчи Владимир Норов Мисрнинг Ўзбекистондаги элчиси Амира Фаҳмини қабул қилди. Бу ҳақда ТИВ ахборот хизмати хабар қилди.
Қайд этилишича, учрашувда Ўзбекистон—Миср ҳамкорлиги барча соҳаларда жадал ривожланиб бораётгани таъкидланган. Олий даражада эришилган келишувларни ўз вақтида ва сифатли амалга ошириш юзасидан томонлар биргаликда чоралар кўришга тайёрлиги маълум қилинган.
Бўлажак тадбирлар жадвали, хусусан, Савдо-иқтисодий ҳамкорлик бўйича Ўзбекистон—Миср Ҳукуматлараро комиссиясининг йиғилиши ва икки мамлакат ташқи ишлар вазирликлари ўртасида маслаҳатлашувларининг навбатдаги давраси билан боғлиқ масалалар кўриб чиқилган.
Иқтисодий дипломатияни фаоллаштириш истиқболлари, жумладан, ишбилармон доираларнинг бевосита алоқаларини рағбатлантириш, бизнес форумларни ташкил этиш, тўқимачилик, қишлоқ хўжалиги, фармацевтика ва бошқа соҳаларда инвестиция лойиҳаларини амалга ошириш бўйича фикр алмашилган.
Бирлашган Миллатлар Ташкилоти, Ислом ҳамкорлик ташкилоти ва Шанхай ҳамкорлик ташкилоти доирасидаги томонларнинг ўзаро муносабатларига алоҳида эътибор қаратилган.
Миср делегациясининг Самарқанд шаҳрида бўлиб ўтадиган ШҲТ саммитида иштирокига доир ташкилий жиҳатлар муҳокама қилинган.
Изоҳ (0)