Italiya hukumati rossiyalik milliarder Vyacheslav Kantorning 11 ta villasini xatladi, ular orasida Italiya sobiq bosh vaziri Silvio Berluskonining oilasidan sotib olingan villa ham bor, deb yozadi “RBK”.
Yevropa kengashi Kantorning aktivlarini musodara qilishni aprelda buyurgan edi, o‘shanda unga qarshi shaxsiy sanksiyalar kiritilgandi. Biroq murakkab mulkchilik sxemasi tufayli jarayonni avgustdagina yakunlashga muvaffaq bo‘lishdi.
Nashr aniqlik kiritishicha, villalar Sardiniyaning shimoli-sharqiy qirg‘oqlarida, Porto-Rotondoda joylashgan.
Ulardan biri Berluskonining “Chertoza” yozgi qarorgohiga qo‘shni joylashgan. Bundan tashqari, xatga olingan villalarning bir qismi qachonlardir italiyalik siyosatchining oilasidan xarid qilingan. Xususan, “Primavera” ilgari Berluskonining onasiga, “Dolche Drago” esa uning ukasi Paologa tegishli bo‘lgan.
Aprel boshida Yevroittifoq va Buyuk Britaniya Kantorga qarshi shaxsiy sanksiyalar kiritdi. O‘sha vaqtda u mineral o‘g‘itlar ishlab chiqaruvchi “Akron” kompaniyasi aksiyalarining nazorat paketiga egalik qilardi. Iyunda milliarder 45,1 foizlik ulushini boshqa top-menejerlarga berib, kimyoviy kompaniya nazoratini o‘zidan forig‘ qildi.
Kantor Forbes’ning shu yilgi rossiyalik milliarderlar reytingida 27-o‘rinni egallaydi. Uning boyligi 4,6 milliard dollarga baholanmoqda.
Izoh (0)